CEBU – Patay nang napalgan sa iyang pamilya ang usa ka mag-uuma nga giatngan ug gipusil sa dalan samtang paingon na unta kining mopauli didto sa bukirang bahin sa barangay Bayabas siyudad sa Danao sa utlanan sa lungsod sa Asturias ug lungsod sa Tuburan niadtong Biyernes sa alas 10:25 sa buntag.
Ang biktima mao si Deogracias Amancio Hermoso, 49, molupyo sa nahisgutang lugar ug pagpanguma ang trabaho samtang padayon pang nangita ang kapolisan ug testigo ug dugang impormasyon aron pag-ila sa mamumuno ug sa motibo niini.
Matud ni SPO4 Teofilo Deguilmo imbestigador sa Danao City Police dihang nahinabi sa Banat News gikan mibisita ang biktima sa balay sa iyang anak nga si Jurel Hermoso, 18, niadtong gabhiuna.
Matud pa sa anak niini ngadto sa kapolisan paingon na unta kining mopauli niadtong higayuna gikan nga nakig-inom sa iyang mga barkada. Apan dihang hapit na kini moabot sa ilang pinuy-anan giatangan kini sa wala mailhing suspek ug gipusil duha ka higayon ug naigo sa iyang baba nga nilapos sa tangkugo ug laing samad pinusilan sa iyang tiyan.
Hinoon matud ni SPO4 Deguilmo nga atol sa gihimong pakisusi ang pinusilan sa iyang baba maoy gituuhang nakaingon sa kamatayon niini. Bisan ang mga kabanay sa biktima wala pa usab makahatag og impormasyon o clue kung duna ba kini nakaaway ang mga kabanay sa biktima.
Ang mga imbestigador sa kapulisan sa Danao nibalik sa maong lugar sa bukirang bahin kagahapon aron paghipos og dugang mga impormasyon og ebidensya aron pagsulbad sa krimen. – BANAT NEWS