2 angol sa dasmag

CEBU - Duha ka tawo ang na-angol sa dinasmagay sa mga sakyanan didto sa barangay Tuyan, Naga City niadtong miaging hapon.

Ang mga biktima mao si Isagani Baynosa, hingkod, ug si Renier Demicillo, 26, ulitawo pulos wala matino ang address.

Si PO3 Edwin Yngayo sa Naga City Police Station mitug-an sa Banat News nga gikan sa amihanang bahin ang dumptruck nga nagpaingon sa dakbayan sa Sugbu dihang pag-abot   niini sa Tuyan nasugatan niini ang nagbaguros nga pick-up nga gisakyan sa mga bikktima nga mi-overtake sa gisundan niining sakyanan gikan sa dakbayan sa Sugbu.

Pulos walay nahimo ang duha ka mga drayber, gawas sa pagpadayon sa dinusmogay sa ilang mga sakyanan apan gilupig ang nagsakay sa pick-up kay nasugamak kini sa mga samad ug bun-og sa nagkalainlaing bahin sa ilang lawas.

Samtang ang drayber sa dumptruck nga wala gyud makaangkon bisan gamay nga kadaut sa lawas, mitahan dayon sa iyang kaugalingon ngadto sa kapolisan. Banat News