Nagdala og pinuti dakpan, priso

CEBU - Duha ka tawo nabalhog karon sa prisohan sa Talisay human kini mabawii og mga pinuti sa mga otoridad sa maong dakbayan.

Ang mga suspetsado mao sila si Chito Paraiso, 58, nga taga sitio Bagobo, barangay Jaclupan, ug si Peter Awit, 25, taga barangay San Roque, pulos sakop sa Talisay City.

Si Paraiso nga nagbitbit og 17 pulgadas nga pinuti, nasikop sa mga tanod sa Jaclupan nga sila si Gremy Honor, Delfin Silva Jr., Romulo Lazanas Sr., Nelson Adlawan ug Natalio Aligarbes niadtong Huwebes sa gabii.

Nasakpan sa akto si Paraiso nga nagbahis-bahis sa karsada sa Bagobo nga nagpalaas sa iyang pinuti nga nakapalisang sa mga molupyo sa kabalaka nga habason sila niini.

Hinuon wala na kini mosukol dihang miabot ang mga tanod ug misakmit sa iyang armas.

Samtang si Awit nasakmitan usab sa iyang gitangkil nga 18 pulgadas nga pinuti samtang nagbahis kini didto sa coastal road sa barangay Cansojong kagahapon sa kaadlawon.

Ang mga molupyo sa maong dapit kinsa nahadlok gumikan sa kahait sa maong pinuti, maoy misumbong sa kapolisan.

Busa dihang miresponde si PO3 Leandro Azarcon, PO3 Arnold Damasco, PO3 Mikie Espina, ug PO2 Epifanio Comendido Jr., nabawi dayon nila ang pinuti niini.

Kagahapon gipasaka na sa kapolisan ang kasong concealing of deadly weapon batok kang Paraiso ug Awit. – Banat News