CEBU – Nausab ang huna-huna ni Cebu City ABC president Eugenio Faelnar labot sa Goat Dispersal program ni Kongresista Antonio Cuenco ug buot nalang niining iuli ang pundo alang niini.
Mokapin pa sa P8 milyones ang giingon ni Faelnar nga iyang iuli ngadto sa kongresista aron kini na maoy mopatuman sa nahisgutang programa.
“Dili na lang ko, total iya man nang project, igo ra man mi niyang gisugo, wala may problema ang kuwarta kay naa man na,” sumala sa ABC president.
Una niini, mipadangat og suwat si Faelnar ngadto kang Cuenco nga nagsukna kung iya pa bang ipadayon ang pagpatuman sa programa o iuli na lang ang kuwarta.
Apan ang ABC president giingong gisamukan sa gihimo sa kongresista nga nangita na sa kwentada sa programa nga wala pa hingpit mapatuman.
Kini ang hinungdan nga si Faelnar nakahukom na lang nga mosibog sa implementasyon sa goat dispersal program ni Cuenco.
“Kana gong ingon niana, masakto ka’g sa dili, daghan kaayo og kiyaw-kiyaw, mas maayong sila na lang dili na lang ko ana,” nagkanayon si Faelnar.
Ang gipaabot karon sa ABC president mao na lang ang paghingpit sa gikinahanglang mga dokumento aron iuli na ang pundo.
Nangita si Cuenco sa kwentada sa nagasto sa nahisgutang programa human usab mipadayag si Faelnar og pamahayag nga wala magustuhi sa kongresista.
Una nang gipadayag sa ABC president nga silang mga kapitan sa habagatang distrito naibog sa mga proyekto ni kongresista Raul del Mar.
Partikular na niini ang pagpang-apod-apod ni del Mar og mga mini-bus ngadto sa 46 ka mga barangay sa amihanang distrito.
Gawas niini gisaaran usab ni del Mar ang mga barangay kapitan sa north district nga hatagan og financial assistance matag tuig.
Matud ni Faelnar nga ila kining gikaibog tungod kay ang ilang kongresista nga si Cuenco wala mohatag og susama niini ngadto kanila. – Banat News