Konseho sa Mandaue gisaway

CEBU – Ang mga barangay kapitan sa dakbayan sa Mandaue mipasangil sa mayoriya sa konseho sa dakbayan nga maoy nakaingon sa kalangan sa pagpatuman sa mga proyekto alang kanila tungod sa kanunay nilang pagbabag ug pamolitika.

Ang mga kapitan sa dakbayan miluwat og manifesto nga nag-awhag sa konseho nga gipangulohan ni Bise Mayor Carlo Fortuna sa paghiklin una sa pamolitika.

Ang manifesto mihangyo sa kampo ni Fortuna sa pakighiusa ug mokooperar sa mga maayong plano ug proyekto ni Mayor Jonas Cortes aron maserbisyuhan ang katawhan ug mapalambo ang dakbayan.

Sa maong manifesto maoy ilang gipadayag isip buhing saksi sa kalangan sa mga proyekto alang sa kabarangayan sanglit kanunay man kining gibabagan sa konseho nga gipangulohan ni Fortuna.

Ang mga kapitan nga mipirma mao sila si Kapitan Dionesio Villamor sa Bakilid, Glenn Bercede sa Banilad, Vicente Dayanan sa Basak, Corregidor Cosedo sa Cabancalan, Leo Jabas sa Canduman, Vidal Cabatingan sa Casili, Benjamin Basiga sa Casuntingan, Florello Latonio sa Centro, Edgar Bihag sa Cubacub, Jesus Neri sa Guizo, Carmelino Del Mar Jr., sa Ibabao Estancia, Maria Editha Montesa sa Jagobiao ug Damaso Tumulak sa barangay Labogon.

Dugang sa mipirma mao sila si Kapitan Cesar Cabahug sa Looc, Elstone Dabon sa Maguikay, Tony Maquilan sa Mantuyong, Andres Suson sa Pagsabungan, Oscar Mendoza sa Paknaan, Walter Dy sa Subangdaku, Dario Tarriman sa Tabok, Jesus Arcilla Jr., sa Tawasaon, Mario Bihag sa Tingub, Restituto Villanueva sa Tipolo, barangay Konsehal Mervin Bragat sa Alang-Alang, barangay Konsehal Nelzon Rubio sa Umapad ug Junie Almodel sa Cambaro.

Gipanghimakak hinuon kini sa kampo ni Fortuna ilabi na sa mga proyektong ang tumong alang sa kaayohan ug kalamboan sa dakbayan.

Tungod sa maong manifesto gihagit ni Majority Floor Leader Victor Biaño paghingalan bisan usa lamang niini ka proyekto nga wala ikapatuman tungod sa ilang pagbabag.

Matud pa ni Biaño nga makadaghan na nga higayon nga ilang giaprohan ang giduso nga mga proyekto alang sa kabarangayan apan subo palandungon kay ang executive department wala gyud mopatuman niini. – Banat News