CEBU – Pormal nga gitugyan sa National Police Commission (NAPOLCOM) ang death benefits ngadto sa mga asawa nila ni kanhi SPO1 Pedro Sucion sa Tuburan Police Station ug PO3 Mily Regulacion sa Mandaue City Police Station.
Si NAPOLCOM-7 director Bernardo Calibo maoy personal nga mitunol sa tseke nga balor og P146,472.00 ngadto kang Charlene Sucion, asawa ni Sucion, isip death gratuity benefits nga 80 porsiyento sa binuwang suholan sulod sa usa ka tuig sa iyang bana.
Gawas niini nadawat usab ni Charlene ang P36,618.00 nga tseke isip burial benefits nga 80 porsyento gihapon sa binuwang suholan sulod sa tulo ka buwan ni Sucion.
Gibutyag ni Atty. Ronnie Zandro Oriol, information officer sa NAPOLCOM-7 nga gawas sa biyuda ni Sucion, nakadawat usab sa susamang benepisyo ang biyuda ni Regulacion nga si Leonila Regulacion.
Si Leonila nakadawat og P130,356.00 nga death gratuty benefits ug burial benefits nga P32,356.00.
Matud ni Atty. Oriol nga gawas niini makadawat pa gyud ang maong mga biyuda og monthly pension nga 80 porsiyento sa binuwang suweldo sa ilang mga banang namatay hangtod sa lima ka tuig.
Tungod niini, ang madawat ni Charlene nga pension matag buwan mokantidad og P9,746.00, samtang ang kang Leonila, P8,690.00 usab.
Gawas niini gibutyag ni Atty. Oriol nga hatagan pa gyud og full scholarship sa NAPOLCOM ang mga anak sa maong mga pulis hangtod nga makagraduwar sila sa kolehiyo.
Si SPO1 Sucion nga nadestino sa Station-1 sa Mandaue City Police napusilan patay sa dihang mi-responde kini sa duha ka tulisan nga nagsakay og traysikad sa North Reclamation area niadtong petsa 8 sa Enero niining tuiga.
Samtang si PO3 Regulacion natigbasan-patay sa usa ka sugarol kinsa nasuko nga iyang gibadlong kay naghantak atol sa piyesta sa bukirang barangay sa Tuburan niadtong Agusto 18 sa milabay’ng tuig.
Gipasabot ni Atty. Oriol nga gi-release sa Napolcom ang maong benepisyo sa mga kapikas sa mga namatay nga pulis human masuta nga nahitabo ang ilang kamatayon samtang nagtuman sa ilang katungdanan.