Tomas misaway sa mga Garcia sa ilang pag-agi-agi sa SRP

CEBU – Nabanhaw karon ang pagpanaway ni Mayor Tomas Osmeña ngadto sa pamilyang Garcia sa probinsiya sa Sugbu partikular kang Gobernador Gwendolyn Garcia, igsoon niini nga si Kongresista Pablo John, ug sa ilang amahan nga si Kongresista Pablo Garcia.

Kini human masayod ang mayor nga ang mga Garcia anha mag-agian sa South Coastal Road kung mobisita sa probinsiya matag semana.

Ang wala magustuhi ni Osmeña mao ang giingong kanunay nga panginsulto sa pamilyang Garcia ngadto kaniya ug sa siyudad sa Sugbu ilabina parte sa South Road Properties (SRP).

Tungod niini gihagit sa mayor ang mga Garcia nga dili na moagi sa South Coastal Road sa ilang pagbiyahe ngadto sa lalawigan.

“All of them use the South Coastal Road but what we get in return, insults, so I challenge the governor, her brother, her father not to use the South Coastal Road,” nagkanayon si Osmeña.

Gitataw sa mayor nga kung wala mamugna ang SRP, wala usab karon ang South Coastal Road nga nitadlas sa maong dapit.

Gipadayag sa mayor nga ang angayang atimanon sa mga Garcia mao ang ilang mga proyekto nga gihulagway niini nga dili magmalampuson.

Partikular nga gitumbok sa mayor ang gipasigarbo kaniadto sa Kapitolyo nga trans-axial highway ingon man ang Suroy-Suroy Sugbu.

“You look at them, what happen to their trans-axial highway, wala, palpak gyud na!, even the Suroy-Suroy Sugbu palpak gihapon na!” sumala ni Osmeña.

“The people of the south should realize this, tan-awa ang inyong governor after what I did for the province, they will insult us for it pa,” matud ni Osmeña pasabot ngadto sa taga probinsiya .