CEBU – Usa ka police nga sakop sa Tuburan Police Station ang namiligrong matangtang sa iyang serbisyo human kini mi-Absent Without Official Leave (AWOL) sulod sa 20 ka adlaw.
Base sa report sa Provincial Investigation and Detective Management Branch (PIDMB) ang maong police giila nga si PO2 Noel Rodriguez, ang gi-rekomendar nga matangtang sa iyang serbisyo.
Sa gipirmahang rekomendasyon ni Supt. Anthony Bagarinao chief sa PIDMB nasuta sa pre-charge evaluation wala kini mananghid sa iyang labaw base sa report ni SPO3 Lino delos Santos officer in charge sa Tuburan Police Station.
Giingong dili pa igo ang rason niini nga problema sa pamilya maoy hinungdan sa iyang wala pagpananghid sa iyang labaw.
Nasuta nga sukad niadtong petsa 7 ngadto sa petsa 6 sa Agusto nag-AWOL ang maong polis.
Gumikan kay serious neglect of duty ang sala ni Rodriguez gi-refer na sa CPPO sa PRO-7 ang hurisdiksyon sa maong kaso.