CEBU – Konsehal Victor Biaño mipagawas og kamatuoran o ebidensya nga usa gyud ka Cortes ang nagdumala karon sa Mandaue Public Market nga asawa ni Engr. Zoilo Cortes bisan pa man sa panghimakak sa naulahi nga wala gyud makataak ang asawa niini sa maong merkado.
Sa gihimong press conference kagahapon, si Biaño mipakita og dokumentong si Manding “Lily” Cortes asawa ni Engr. Zoilo Cortes Sr. mipadala og suwat sa kanhi Market Administrator nga si Naome “Gingging” Seno nga naglatid sa pulong nga “To put things in Proper Perspective” ug pinirmahan niadtong Disyembre 8 tuig 2007.
Sa maong suwat gipahibalo niya (Manding Lily) nga siya gi-assign sa maong merkado isip miyembro sa screening committee ug may katungod pagpili kung kinsa ang ilang taktakon o ipabilin sa pwesto.
Pipila ka bulan ang milabay human madawat ang maong suwat nawagtang sa serbisyo si Seno ug gihulip si Antonino Tumungha diin gidudahan nga si Manding Lily ang hinungdan.
Ang maong suwat gihulagway ni Biaño nga pagmatuod nga ‘nanghilabot’ gyud si Manding Lily sa mga kalihukan sa merkado publiko ug bakak ang pangangkon sa bana niini.
Nagplano karon si Biaño nga ihatud na ngadto sa Ombudsman Visayas ang maong dokumento aron magamit sa imbestigasyon kalabot sa nepotismo sa balay lungsod sa dakbayan sa Mandaue.