Experimental rerouting sa 13C wala mosaler

CEBU – Hingpit nang gibasura sa konseho sa dakbayan sa Sugbu ang sugyot sa Citom board nga himuong permanente ang gipatumang experimental rerouting sa 13C nga rota niadtong buwan sa Hulyo.

Kini human usab aprubahi sa City Council ang committee report sa chairman sa Committee on Transportation nga gipanguluhan ni Konsehal Sylvan Jakosalem nga nagsalikway sa Citom resolution.

Una nang mipadayag og dakong pagsupak ang konsehal sa gihimong kausaban tungod usab sa mga reklamo nga iyang nadawat gikan sa mga PUJ driver ingon man sa mga pasahero nga apektado.

“So ang akong stand kaniadto nga nagsupak sa gipatuman nga experimental rerouting nahimo na karong opisyal nga baruganan sa konseho human aprubahi ang akong gipagawas nga committee report,” sumala ni Jakosalem.

Tungod niini miingon ang konsehal nga dili na angayang mabalaka ang mga pasahero nga naapektahan sa experimental rerouting tungod kay pabalikon na ang mga PUJ sa 13C nga rota sa ilang karaang agianan.

“Dili na maguol ang mga pasahero ilabi na tong mga estudyante nga nangreklamo kay dili na man mahinayon ang paghimong permanente sa experimental rerouting kaniadto,” dugang pamahayag sa konsehal.

Subay niini, gipakigtagboan na ni Jakosalem ang mga PUJ driver sa 13C nga rota ug gipahibawo sa maong kalambuan aron mubalik na sa ilang karaang rota sa wala pa ipatuman ang experimental rerouting.

Kini nagpasabot nga mosubay na ang 13C nga rota sa dalan Colon, lahos sa dalan Borromeo ngadto na sa dalan Sanciangko, right turn sa dalan Panganiban, right turn sa Natalio Bacalso Avenue ngadto na sa destinasyon niini.

Sa gipatuman nga experimental rerouting, ang 13C nga rota mosubay gihapon sa dalan Colon apan anha na mo-right turn sa dalan Jakosalem nga gihulagway sa konsehal nga nakahatag og kahuot sa maong dalan.

Awhag ni Jakosalem ngadto sa mga traffic enforcer nga estriktuhon ang pagpatuman sa mga lagda sa trapiko aron magpabiling hapsay ang dalan Colon ning subling pagsulod sa mga PUJ sa 13C nga rota.