CEBU - Mga residente sa barangay Lagtang, dakbayan sa Talisay ang naukay sa kahadlok tungod sa usa ka tawong hubog kinsa giingong nagdala og granada ug misukmag sa windshield sa usa ka traysikol niadtong Martes sa gabii diha sa nahisgutang lugar.
Ang suspetsado naila sa mga polis nga si Tommy Echavez, residente sa maong lugar kinsa nagtago na karon, ang mireklamong mga biktima mao sila Ronald Cabuenas, 29, drayber sa traysikol ug ang pasahero niining si Marivic Ewayan, 28, pulos mga residente usab sa Lagtang.
Sila si Cabuenas ug Ewayan ang daling mitaho diha sa kapolisan sa barangay Poblacion kabahin sa maong hitabo ug misumbong nga kalit silang gibabagan ni Echavez ug sa walay igong rason gisukmag ang windshield sa iyang traysikol ug naigo sa mga bildo si Ewayan. Base sa taho nga si Echavez ang nagbit-bit og granada nga giputos og panapton nga gabahis diha sa karsada, apan dihang naabot ang mga polis midungan kini og dagan ug nisagol sa mga nagkatibulaag nga mga residente.
Si Police Senior Inspector Jovito Canlapan, officer-in charge sa Talisay Police Station sa pakighinabi niini sa mga tigbalita kagahapon sa buntag nagkanayon nga wala pa mapiho kung granada ba gyud ang dala sa suspetsado tungod kay base sa ilang nakuha nga impormasyon nagbit-bit kini og butang nga sama sa lata sa sardenas nga giputos og panapton.
Samtang gihimakak ni Canlapan nga ang unang mga polis nga nakaresponde nanagan pagkakitang granada ang dala niini.
Ug pagkaabot sa mga polis nga mi-back-up sa unang miresponde gilibutan dayon ang lugar apan wala na nila masikop si Echavez kay giingong misaka kini sa ibabaw nga bahin sa lugar diin ngitngit na ang palibot ug aduna nay mga tawo nga nagtapok.