CEBU - Anomalosong transaksyon sa pagkuha og gasolina sa mga departamento sa Mandaue City Hall gisugdan na kagahapon sa buntag sa sesyon sa konseho sa dakbayan sa Mandaue.
Si Konsehal Emilio Rosal, ang Chairman sa Committee on Appropriation, Budget and Finance nagkanayon nga tumong sa pagtuki niini mao ang pagtino unsa ka tinuod ang mga report nga dunay mga binuang nga nagpaluyo sa pagpalit og gasoline sa mga sakyanan sa dakbayan.
Diha sa maong sesyon ang mga komitiba sa pamalaod ug ordinansa, assets ; Good Government ingon man ang gipatawag nga mga department heads sa Budget nga si Lamberto Marababol; Engr. Lope Sopo Jr. sa Motorpool; Atty. Ernesto Maringura OIC Chief sa Accounting Division; Mandaue City Administrator Atty. Briccio Boholst.
Lakip sa gipatawag mao ang management sa Ceniza Petron Service Center nga girepresentahan sa manager nga si Melinda “Mimi” Cabahug.
Ang Ceniza Petron Service maoy kuhaanan sa dakbayan og mga krudo ug gasolina alang sa mga sakyanan niini.
Gibutyag ni Rosal nga nahibulong sila sa nadiskubrehang matag adlaw moabot ngadto sa 30 litros nga gasoline ang pangayuon sa mga departamento sa Budget ug sa City Engineering Office.
Kini tungod kay dili makatuo ang konseho nga mahurot dayon sa usa ka adlaw ang maong gidaghanon sa gasolina nga walay mga importanteng lakaw ug proyekto sa maong departamento.
Gibutyag usab ni Rosal nga duna silay nadawat nga report nga mahimong i-convert ang purchase request ngadto sa cash kung di mahurot og tubil sa tangke sa sakyanan ang 30 litros base sa mga resibong nakuha ni Rosal isip ebidensya.
Dugang pa niini mao ang impormasyong mismong ang mga gas boy sa maong gasolinahan nakigkunsabo usab pinaagi sa pagbutang sa containers o gallon ang sobra sa 30 litros nga di na masulod sa tangke.
Gikatahong ang uban niini gibaligya ug ang uban wala na igkita ug gituuhang gipangawat.
Sa impormasyon giang-kon ni Boholst nga duna siya’y nadawat nga taho nga dunay “suyupon” ug illegal nga ipamaligya ang mga gasolina sa mga sakyanan nga iya sa kagamhanan sa dakbayan sa Mandaue apan wala pa nila mailhi kung si kinsa ang mga mihimo niini.
Si Cabahug sa iyang bahin mipadayag nga wala siya’y mahimo ug sundon lang ang kung unsay gibutang diha sa purchase receipt o ba kaha puchase order ingon man sa trip tickets sa mga driver nga mopatubil sa ilang gasolinahan.
Miangkon usab si Cabahug nga dunay posibilidad may panagkunsabo gyud sa iyang mga pumpboy ug sa mga drivers hinungdan dili nila ma-monitor kung ang sobrang gasolina base sa purchase receipt adto itubil sa mga containers.
Samtang giangkon ni Engr. Sopo nga usahay magdala sila og galon o container ngadto sa gas station ilabi na kung ang sakyanan dili makadagan kay nahutdan og gasoline.
Giangkon usab ni Sopo nga dunay mga higayon nga kung dili mahurot ang gasolina base sa PR pwede kini nilang hulipan og cash ngadto sa gasoline station apan kini hugot nga gipanghimakak ni Cabahug.
Gumikan niini si Boholst mipadayag nga sila mismo nakakita na sa maong problema sa paglingkod palang nila sa ilang katungdanan ug dihang una nila kining nadiskubrehan dunay departamentong ilang gibawian og sakyanan.
Pipila niining mga sakyanan sa mga departamentong gikuhaan og sakyanan gumikan sa kwestyonableng pagkuha og gasolina gipanghatag ngadto sa Mandaue City Police Office.
Human kini mapatuman gikatahong miubos ang gasto sa pagkuha sa dakbayan sa pagpalit og gasolina kung itandi sa milabay’ng administrasyon ni Thadeo Ouano.