2 'pushers' sikop sa PDEA-7

CEBU - Nadakpan ang usa ka lalaki nga giilang level-2 drug pusher ug laing kauban niini sa mga sakop sa Philippine Drug Enforcement Agency (PDEA)-7 atol sa buy bust operation sa miaging gabii diha sa barangay Duljo-Fatima ning dakbayan sa Sugbu.

Si Jessie Tabanao, tigpamaba sa PDEA-7 miila sa ilang dinakpan nga mao sila si Marlon Quezon, 25, ug Ricardo Dinawanao, 18, pulos molupyo sa naasoy'ng lugar.

Si Quezon gihulagway sa PDEA nga level-2 drug pushers sa ilang lugar ug taud-taud na sad ang iyang kalihokan sa pagpamaligya og ginadiling drugas. Matud ni Tabanao ilang gi-surveillance sulod sa usa ka bulan si Quezon human sila makadawat og impormasyon kabahin sa pagpamaligya niini og shabu sa maong dapit.

Usa sa PDEA agents maoy gikatransaksyon ni Quezon nga mopalit og usa ka pakete nga shabu nga nagkantidad og P200 diha sa usa ka compound sa naasoy'ng dapit.

Matud ni Tabanao si Dinawanao maoy niabli sa gate niadtong tungora ug gitudloan gilayon ang poseur buyer sa nahimutangan ni Quezon.

Human matunol ni Quezon ang usa ka paketeng shabu bugti sa P200 nga diha na sa iyang kamot gisignit gilayon si Dinawanao.

Nakuha sa posisyon ni Quezon ang laing 144 ka paketeng gidudahan ang sulod nga shabu nga gisulod sa gamay'ng bawnanan gawas sa laing usa ka pakete atol sa buybust. Samtang upat sab ka pakete sa shabu ang nakuha diha sa bulsa ni Dinawanao.

Sa dihang gipangutana sa mga sakop sa media ang duruha pulos nihimakak nga ilaha ang shabu.

Apan giangkon ni Quezon nga duha na siya ka bulan namaligya apan dili gyud permanente.