1 patay sa bangga

CEBU - Patay ang usa ka lalaki nga giingong hubog nga nagmaneho sa iyang motorsiklo nga aksidente nga nibangga sa nag-parking nga truck de karga daplin sa dalan sa barangay Dakit siyudad sa Bogo niadtong Lunes sa alas 11:30 sa gabii.

Ang namatay paghidangat sa Bogo District Hospital mao si Ariel Ortega Rosende, molupyo sa barangay Cogon samtang naangol usab ang backrider nga sila si Enrique Mandrino, 28, taga barangay Gairan sakop sa nahisgutang siyudad.

Matud ni Supt. Tito Satera, hepe sa Bogo City Police dihang nahinabi sa Banat News nag-parked ang maong trak de karga tungod kay dunay problema ang maong sakyanan ug gibiyaan sa drayber kansang pangalan wala pa gihapon mailhi.

Ang mga biktima gikan pa sa barangay Lapaz ug paingon unta sa Bogo, Proper apan paghiabot sa nahisgutang lugar kusog na kaayo ang dagan sa motor ug wala makabantay sa nag-urong nga trak diha sa dalan.

Subay sa pamahayag sa mga nakasaksi tungod sa kakusog pagsampak sa motor diha sa trak nalagpot ang mga sakay niini pipila ka metros hinungdan nga nangaangol.

Nasuta sa inisyal nga imbestigasyun sa kapulisan nga hubog ang biktima nga nagmaneho sa iyang sakyanan.