Sundalong 'Hubog' Gikulata

CEBU - Gitabangan og kulata sa iyang gikainom ang usa ka sundawo ug giingong gidisarmahan sa iyang armas ug cellphone sa miaging gabii diha sa Elizabeth Pond, Purok 4 sa barangay Camputhaw ning dakbayan sa Sugbu.

Midangop sa Fuente Police station human nagpahiling sa iyang mga bun-og sa Cebu City Medical Center (CCMC) si Corporal Elaeddy Suralta sakop sa Light Reaction Batallion, Southern Command sa Philippine Army kansang buhatan anaa sa Central Command.

Gitumbok ni Suralta ang iyang gikainom maoy mikulata kaniya kinsa kasamtangan gitanggong sa Fuente Police station mao sila si Segundo Saldua, 35, Christian Mingoy, 21, ug Mark Lingao-lingao, 22, pulos molupyo sa naasoy'ng lugar.

Si Corporal Suralta nitug-an sa kapolisan nga nianha siya sa dapit aron bisitahon ang iyang mga anak apan dihay mga silingan nga nag-inom niadtong higayona ug giimbitar siya nga paimnon.

Tuod man, dugang asoy ni Suralta nga iyang gipalitan og usa ka kahon nga beer ang iyang silingan uban sa mga suspek.

Apan sa dihang molakaw na unta siya kalit lamang gibunalan og botelya ang iyang ulo ug gitabangan og kulata sa mga suspek hangtud nawad-an sa panimuot ang maong sundawo nga miresulta sa pagkawagtang sa iyang service firearm nga .45 pistol ug cellphone.

Sa ilang bahin ang tulo ka mga suspek nipasangil nga gipangtionan sila sa armas ni Suralta hinungdan ila kining gitabangan og kulata, gipanghimakak usab nilang gikuha nila ang .45 kalibre pistola ug cellphone sa maong sundalo.

Si SPO1 Richard Catacutan sa Fuente Police Station mitug-an nga nakig-settle ang maong sundawo sa mga suspek maong ilang gi-release ang tulo.

Matud ni SPO1 Catacutan base sa ilang nakuhang dugang impormasyon sa mga residente hubog kaayo ang maong sundawo ug gipangtionan sa armas ang mga silingan niini.

“Nagligid-ligid kuno sa kahubog hangtud nakatulog ang maong sundawo. Pagmata wala na diha iyang .45 pistol maong nanghagis napod, pagtan-aw sa mga batan-on wala na diha iyang armas (sundawo) gitabangan og kulata,” matud pang Catacutan sa mga tigbalita.

Matud ni Catacutan ang armas ni Suralta gitagoan sa silingan aron dili makapusil ug kagahapon sa buntag giuli sa nagtago ngadto kang Suralta.

Nidugang si Catacutan ang duha ka magazine sa .45 ni Suralta gihipos usab sa iyang mga kaubang sundawo kinsa miresponde sa dapit atol sa maong insedente.