CEBU - Nahilandig sa tambalanan ang usa ka bana dihang gipusil kini sa tulisan nga mitulis sa iyang asawa didto sa Cansaga, Consolacion, niadtong Lunes sa alas 9:00 sa gabii.
Ang biktima mao si Felomino Lumapas, 56, minyo nga tag-iya sa Bing’s Pharmacy sa Mantuyong, Mandaue City nga may branch usab sa New Public Market sa Cansaga, Consolacion.
Si SPO2 Rizalino Aligno nga nahinabi sa Banat News miingon nga ang biktika ug ang asawa niini nga si Gabriela Lumapas mao pay pagpanira sa ilang tindahan sa New Public Market sa Cansaga dihang kalit lang nga mihunong sa ilang nahimutangan ang pula nga motorsiklo nga giluwanan sa duha ka wala hiilhing lalake.
Ang nag-angkas maoy miduol sa asawa sa biktima dungan ang pagtion og armas ug mideklalar nga tulis, dayong bunlot sa shoulder bag niini.
Si Felomino nga nakakita, dali nga mihamag sa pag-ilog sa shoulder bag nga didto na sa tulisan, apan kalit kining gipusil sa walang dughan nga maoy nakaingon sa iyang pagkahagba sa yuta.
Dihadiha mipasirit dayon sa ilang motorsiklo ang maong mga tulisan pahilayo sa maong lugar.
Samtang ang biktima gidala dayon ngadto sa dakbayan sa Sugbu ug gipatambalan kini sa usa ka pribadong hospital.
'Hit & run' driver tiklo
Nasikop sa kapolisan kagahapon sa buntag ang usa ka drayber sa “hit and run” nga sakyanan nga midasmag patay sa usa ka 51-anyos nga tigulang didto sa Sitio Cogon ,barangay Poblacion lungsod sa Liloan niadtong Domingo sa gabii.
Ang nadakpan mao si Joselito Auman, 40, minyo, nga taga Cemboryo, Tayud, Liloan.
Siya maoy gitumbok sa mga nakasaksi nga maoy midasmag kang Benvienido Ramirez Roa, 51, minyo, nga taga-Cogon, barangay San Vicente sakop sa nahisgutang lungsod.
Matud ni SPO1 Joseph Turlao sa Liloan Police Station nga naglakaw ang biktima paingon sa ilang balay dihang kalit lang kining gidaro sa naghagoros nga multi cab nga gemaniho ni Auman.
Apan si Auman nangatarungan ang mihana og labang ang biktima maoy hinungdan nga nadasmagan kini sa iyang sakyanan.
Matud pa ni SPO1 Turlao nga gibiyaan lang sa suspetsado ang biktima diha sa dalan human kini dasmagi.
Apan nadakpan gyud kini dihang giatangan sa kapolisan sa karsada sa pagpauli na niini nianang pagkabuntag.
Ang drayber gibalhug na karon sa karsel samtang gi-andam na ang kasong reckless imprudence resulting to homicide nga ipasaka batok kaniya.