Mass supporters sa NPA mitahan dala ang armas

CEBU - Duha ka giingong mass supporters kaniadto sa rebeldeng New Peoples Army (NPA) nisurender sa mga sakop sa 78th IB, kalisod maoy ilang gitumbok nga hinungdan nganong nibalik sila sa sabakan sa balaod.

Ang nisurender mao sila si Ron ug Diosdado tinuod pangan ug apelyedo gitago sa Banat News pulos hingkod ang edad molupyo sa usa sa mga barangay sa lungsod sa Catmon.

Ang duha nisurender usab sa duha ka Springfield caliber .30 nga giingong gibilin kaniadto diha kanila sa mga rebelde.

Ang duha makapahimulos sa “Balik Baril Program” sa AFP diin ang matag usa ka tag-as nga armas dunay tag P2 mil apan ang Central Command midugang og laing P2 mil matag armas.

Si Ron dihang gi-presentar sa mga sakop sa 78th IB diha sa headquarters sa barangay Nangka nagkanayon nga lahi sa kaniadto ang militar ug polis maayo na karon.

Matud ni Ron ang tanang gipasalig kanila kaniadto sa rebeldeng NPA nga sa higayon makab-ot ang kadaugan panghatagan ug makaangkon sila og luna sa yuta apan walay bisan usa niini ang natinuod.

Nitataw siya nga nagsugod siya isip mass supporters sa NPA niadtong tuig 1987 ug nibuwag niadtong 2004 human ang kanhi niya mga kauban maoy nitambag kaniya nga karon nahimo nang mga opisyal sa barangay.

Si Lt. General Pedro Ike Inserto sa pakighinabi sa mga tigbalita nagkanayon ang sunod-sunod nga pagsurender sa mga mass supporters natigayon gumikan sa kausaban sa militar ug sa PNP.

Kini maoy ikaduhang higayon nga dunay nisurender nga mass supporters sa NPA, niadtong miaging bulan dunay laing upat ka mga mass supporters nga taga Danao, Tabuelan ug Tuburan ang nisurender usab sa 78th IB.