Mga 'dalaw' sa City Jail nireklamo tungod sa pletihan sa habal-habal

CEBU – Nangreklamo na ang mga dalaw diha sa Cebu City Jail sa barangay Kalunasan tungod sa giingong taas nga singil sa plite sa mga habal-habal driver.

Ang nahisgutang reklamo nahiabot na kang Mayor Tomas Osmeña hinungdan nga kini iya nang gipangitaan og solusyon.

Matud ni Konsehal Augustus Pe Jr., nga siya maoy gisangunan sa mayor pagpadagan og Kaoshiung Bus nga mohatod ug mokuha sa mga dalaw.

“Daghan kaayo ang nanawag ni mayor nangreklamo ba nga mahal na kaayo ang singil sa mga habal-habal driver sa ilang pagsakay samtang mubisita sa ilang mga paryente ba nga napriso, mao nga ni-order si mayor nako nga pabutangan ug Kaoshiung bus,” sumala pa ni Pe.   

Ang maong bus nag-inusara ra ug anha manukad sa Fuente Osmeña, ug sa matag adlaw’ng Lunes, Martes ug Huwebes.

Nasayran gikan sa City Jail nga ang mga adlaw lang nga Miyerkules ug Biyernes, maoy dili paduawan sa pamilya sa mga binilanggo.

Gibana-bana usab sa City Jail nga dunay 350 ngadto sa 400 ka mga dalaw ang mobisita sa ilang mga piniriso sa matag adlaw nga tingduaw.

Gipasalig hinuon ni Konsehal Pe nga mahimong dugangan og Kaoshiung bus nga pabiyahion sa City Jail kung gikinahanglan.

“Ato lang tan-awon kay suway pa man nang usa ka Kaoshiung, if there’s a need then mahimo siguro natong dugangan,” nagkanayon ang konsehal.

Ang Cebu City Jail duna karoy 2,196 ka mga inmates, human mahatod sa miaging semana ang dul-an sa 40 ka mga insular prisoner ngadto sa kauluhan.

Giingong ingon usab niini ang gidaghanon sa mga dalaw nga mobisita sa maong bilanggoan kung ang matag piniriso bisitahon sa ilang paryente sa matag adlaw nga tingduaw.