CEBU - Duha ka mga babaye ang natanggong sa Carbon Police Station human nadakpang nag “shoplifting” o nanipit og tinda sa usa ka tindahan diha sa may dalan Colon niadtong Sabado pasado alas 12:00 sa udto.
Si PO2 Rogelio Caballes sa Carbon Police Station nga nahinabi sa Banat News miila sa mga nasikop nga si Jemma Flores, 30, taga-Laray, barangay Inayawan, ug Chona Bulasa, 38, taga Lawis, Pasil, ning dakbayan.
Si Flores unang nasikop sa mga guwardiya sa Hundred Islands Merchandizing , ug gisundan usab kini sa pagkasikop ni Bulasa sa mao gihapong tindahan.
Matud pa ni PO2 Caballes nga ang duha dili kauban apan walay suwerte kay nabantayan ang matag usa kanila sa mga guwardiya dihang ilang gipangsipitan ang mga baligyang pantalon sa paggawas sa tindahan nga wala bayri.
Sumala pa ni PO3 Caballes, nga si Flores nabawian og upat ka mga tukong nga pedal jeans nga mokantidad sa P700 pesos.
Samtang si Bulasa gibawian usab og unom ka mga maong pants nga mokantidad og P1,833.25. - BANAT