Pagbaligya sa CCMC Cuenco supak apan si del Mar di motuo

CEBU - Dakong supak si Cebu City South District Congressman Antonio Cuenco sa plano ni Mayor Tomas Osmeña pagbaligya sa Cebu City Medical Center (CCMC).

Alang sa kongresista ang City Hospital dako og ikatabang ilabi na ngadto sa kabus nga mga pasyente nga taga dakbayan tungod kay kung ma-pribado kini dili na makadangop ang mga kabus.

“Kanang baligyaan unya niana, ma-pribado na kana, magpatuyang unya na sila og kubra unya dili na maka-afford ang kabus natong kaigsoonan unsay mahitabo nila,” sumala sa kongresista.

Sugyot ni Cuenco ngadto sa mga opisyal sa dakbayan nga angayang tun-an ug hashasan ang maong lakang aron dili mabasol ug magbasol sa kaulahian.

Sa iyang bahin, dili kumbinsido si Cebu City North District Congressman Raul del Mar nga tinud-on pagbaligya sa siyudad ang CCMC.

Nagtuo si del Mar nga ang gihimo sa mayor maoy usa lang ka paghagit ngadto sa nagdumala sa nahisgutang tambalanan.

Kini alang usab sa paghatag og maayong serbisyo ilabi na ngadto sa kabus nga mga pasyente nga mahadangat diha sa CCMC.

“I do not believe that mayor Tommy will sell the hospital, I think he is just serving a warning for the personnel to shape up and deliver the quality medical services that everybody wants, he is just expressing his frustrations to the negative feedback that he got,” nagkanayon ang kongresista.

Apan nasayran nga gihatagan na og pagtugot ni Osmeña ang University of San Carlos nga mopahigayon og appraisal diha sa nahisgutang tambalanan.

Ang USC gikataho nga usa lang sa pipila ka mga institusyon sa Sugbu nga dunay interes pagpalit sa City Hospital.

Nakahuna-huna si Osmeña pagbaligya sa CCMC tungod sa iyang pagtuo nga dili na mausab ang batasan sa mga personnel niini. - BANAT