'Tulisan' nang-hostage dakpan

CEBU - Usa ka security guard nga giingong nanulis ang mi-hostage sa usa ka tiguwang babaye human kini ma-corner sa mirespondeng kapolisan alas 11:45 niadtong niaging gabii gawas nga bahin sa Neo-Neo Restaurant sa dalan Dela Montaña barangay Mabolo ning dakbayan.

Si PO2 Jerybel Lerio sakop sa Criminal Investigation and Intelligence Branch (CIIB) nga nahinabi sa Banat News miila sa nadakpan nga si Gary Namanas, 33, taga-Tangke II barangay Mambaling sakop sa Fisher Security Agency nga na- destino diha sa IT Park.

Nadakpan usab sa follow-up operation mao ang gitumbok nga utok sa pagtulis nga si Rey Adlawan kanhi security guard sa Neo-Neo Restaurant nga silingan ni Namanas, samtang gipangita pa si Rodello Namanas pag-umangkon ni Gary usa usab ka security guard, ingon man usa ka Anecito Santander taga Zamboanga del Sur nga konduktor og PUJ kinsa maoy nakasakay sa taxi ug nakasibat dala ang P69 mil pesos nga halin sa restaurant.

Matud pa ni PO2 Lerio nga padulong na unta silang duha ni PO3 Jonas Tajanlangit nga mangaon sa usa ka kan-anan sa maong dapit gikan sa pag-pull-out sa check point niadtong tungura ug naagi diha sa maong lugar.

Gikatahong gitulis sa mga suspek ang magtiayong kawani sa Neo-Neo restaurant nga sila si Roger ug Jelen Comaling nga taga-Casals Village Mabolo.

Matud pa niini nga ang magtiayong Comaling nagsakay na unta sa ilang motorsiklo diha mismo sa atubangan sa ilang gitrabahoan aron unta pag-remit sa halin sa restaurant.

Apan kalit lang gitionan nila ni Anecito Santander ug Gary Namanas sa dala nga .45 pistola ug deklarar og tulis.

Human makuha ni Santander ang bag nga gisudlan sa P69 mil kapin ka pesos dali kining nakasakay og taxi apan si Namanas gidemalas kay nahibilin hinungdan nga nidagan usab kini apan gigukod sa mga bystanders sa dapit.

Naaktuhan nila ni PO2 Lerio ug PO3 Tajanlangit nga nagkaguliyang ang mga tawo sa lugar hinungdan nga ilang gi-respondehan.

Apan wa damha dihang na corner na si Namanas sa pader sa may Dela Montaña St., ug F. Cabahug gumikan kay wala kini makalabang kalit lang gi-hostage ang 68 nga tiguwang babaye nga si Jovita Lazarte taga Cabantan barangay Luz kinsa nagpasakay sa iyang anak.

Diha-diha gibira ni Namanas si Lazarte ug gitiunan og armas sa ulo apan si Namanas samtang gialirungan sa mga tawo ug si PO3 Tajanlangit naa sa atbang ug wala na siya’y kaagian.

Matud pa niini nga nilanat pa sa sobra 30 minutos ang nahitabong hostages drama una pa nitahan si Namanas.

Gibutyag niini nga makaduha ka higayon nga nisuway si Namanas og sakay og taxi apan iyang gipasidan-an ang mga driver nga dili mopasakay samtang gibabagan niya ang dalan.

“Ni surrender to siya dihang nakita niya nga nangabot naman ang daghang mga police patrol car nga nakasirkulo sa lugar ug nagtion niya ang mga police na pressure siguro giitsa nalang ang armas nga naay unom ka mga buhing bala,” asoy pang Lerio.

Matud pa niini nga si Adlawan pabilin karon nagpakahilom human ilang nasikop samtang si Namanas ang nagkanayon nga nagipit lang sila sa kwarta maong sila nanulis.

Sumala pa ni PO2 Lerio nga si Namanas nitug-an nga si Adlawan maoy nagplano sa maong pagpanulis ug niadto pang petsa 23 sa Agosto sa niaging bulan nila kini giplano.

Nipahigayon sila’g surveillance niadtong petsa 30 sa Agosto mga alas 10:00 sa gabii ug niadtong niaging gabii silang duha ni Santander ang nihimo sa pagpanulis.

Narekober usab sa mga sakop sa MPG ang mokabat P1,663.25 nga pulos sinsilyo nga gisulod og plastic nga gibiyaan ni Santander diha sa iyang gipuy-an sa Mambaling. - BANAT