CEBU - Nitingog na si Cebu City South District Congressman Antonio Cuenco labot sa gipasangil ni ABC president Jingjing Faelnar nga wala kini nahimong mga proyekto nga naghatag og dakong kaayuhan sa kabarangayan sa ilang distrito.
Matud sa kongresista nga dakong bakak ang pasangil ni Faelnar tungod kay ubay-ubay nga mga proyekto ang iyang gibubo sa kabarangayan sa south district.
Gani gihinganlan pa ni Cuenco ang ilang kapitan sa barangay Guadalupe nga lampingasan gawas sa unang giingon niini nga bakakon.
“Kanang giingon sa dako-dako sa mga barangay kapitan nga lampingasan kaayo, bakak kana, lunlon kanang bakak,” sumala ni Cuenco.
Miingon ang kongresista nga ang mga barangay kapitan mismo sa iyang distrito ang niingon kaniya nga siya daghan og nahimong mga proyekto.
“Daghan kaayo ko og nahimo sa south district, unya ang mga kapitan karon niingon kanako nga daghan kaayo ko og proyekto sa akong distrito, kanang barangay captain sa Guadalupe, lunlon bakak kanang iyang gipasiatab,” dugang pamahayag sa kongresista.
Pabilin hinuong gibarugan ni Faelnar ang iyang pasangil nga sukad sa paglingkod ni Cuenco wala pa kini nahimo ug nagkanayon nga silang mga kapitan sa south district naibog sa gipanghatag ni Kongresista Raul del Mar nga mga mini-bus sa kabarangayan sa north district nga mahimo untang himuon ni Cuenco.
“Dili na lang ko mo-react sa iyang giingon nako kay sayon-sayonon lang ra ba ko ana niya, pero kang Tommy (Mayor Tomas Osmeña) dili gyud na siya motingog, ang ako lang nga ipapangutana ang mga tawo og naa ba gyud siya'y gibuhat nga klaro ba, visible gyud nga gikan niya,” matud ni Faelnar.
Gani niingon si Faelnar nga sa ila mismong barangay ni Cuenco sa Guadalupe kini nisaad nga hatagan og pundo nga ipaayo sa atubangang bahin sa ilang barangay hall ingon man sa pagpapintal sa ilang sports complex apan hangtud karon wala pay timailhan nga tumanon sa kongresista ang gisaad niini sa ilang mga konstituwente. - BANAT