Mga boring manulod sa City Jail

CEBU - Dako’g posibilidad nga adunay matakbuyan sa sakit nga HIV-AIDS sa mga inmates diha sa Cebu City Jail kun magpadayong makasulod ang mga mugbo’g lupad sa maong bilanggoan.

Kini maoy gipadayag ni doctor Rene Joseph Bullecer ang tsirman sa Cebu Anti-Indecency Board (CAIB) dihang nahinabi sa Banat News subay sa reklamo sa pipila ka mga asawa sa mga binilanggo nga ni-report ning pamantalaan nga yano lang kaayong makasulod ang mga mugbo'g lupad sa maong prisohan.

Alang kang Bullecer kun matinuod man gani o dili ang report gikinahanglang susihon kini dili usa ka sakop sa CAIB.

Gikabalak-an nga dunay priso nga matakbuyan unya sa maong sakit kung may usa ka mugbo og lupad nga magdala sa maong sakit nga makatakboy sa priso.

Sumala pa niini nga usa ka dakong ‘black-eye’ kini sa city jail kun dili i-verify ni Jail warden Supt. Efren Nemeño o kaha ang warden wala makadawat sa maong report.

Samtang sa iyang bahin si Inspector Anacleto Durasan Jr. acting Deputy warden sa City Jail ug chief jail custodial and rehabilitation nga gikahinabi sa Banat News niawhag niadtong mga asawa sa pagpadangat sa maong reklamo diha sa ilang buhatan.

Matud pa niini nga kun nakaila ang mga asawa ning mga babayeng mugbo’g lupad ipahibalo gilayon kini ngadto kanila aron ilang mahimoan og aksyon.

Sumala pa niini nga duna na sila'y mga kausaban sa pagdawat og mga bisita sa ingon dili gyud makasulod ang mga barkada lang ug mga magpailang higala.

Giklaro niini nga ang first priority nila mao gyud ang mga modalaw nga pamilya, mga asawa ug anak apan kun kabahin sa ubang aspeto limitado kaayo. - BANAT