CEBU - Usa ka doktora paingon motambong og meeting ang naangol human maguroy sa tulo ka esnatser nga sakay og awto nga Nissan Sentra niadtong Huwebes sa gabii pasado alas 7 diha sa dalan Fortich St,. Banawa sa barangay Guadalupe ning dakbayan sa Sugbu.
Ang biktima giila nga mao si Dr. Elaine Teleron Ruiz, biyuda ug nagpuyo sa Banawa, Guadalupe ug nag-alagad isip doktor diha sa Department of Health (DOH).
Sa imbestigasyon ni SPO2 Wenefredo Costelo sa Guadalupe Police Station, paingon ang biktima sa Alliance of Two Hearts aron motambong sa meeting.
Apan samtang siya naglakaw kalit siyang gihunongan sa kolor pulang awto nga nagatangag og plakang GSB-513.
Usa sa duha ka mga sakay niini ang nikanaog ug nisuway paglabnot sa dalang bag sa biktima apan napakyas sa unang pagsuway apan wala buhii sa biktima ang bag hangtud nga namalik na og sakay ang mga suspek nga naggunit gihapon sa iyang bag hinungdan sa pagkatumba niini ug naguroy sa sakyanan.
Samad ug bun-og sa tuong siko ug ulo ang nahiaguman sa biktima kinsa daling misumbong sa kapolisan ug giatiman ang iyang samad.
Sa pakisusi sa kapolisan ngadto sa Land Transportation Office (LTO) nasuta nga ang maong sakyanan gipanag-iya og adunahan ug ang anak niini giingong nalambigit na usab og pagpanglabni ug sulod-gawas na sa rehabilitation center.
Hinuon matud sa kapolisan sa Guadalupe ilang paaboton ang biktima nga mopakita ug mosang-at og kaso batok sa mga suspek. – BANAT