CENTCOM miawhag sa Karapatan pagdapig sa NPA victims

Pabiling gibarugan ni Lt. General Pedro Ike Inserto, Commanding General sa Central Command nga ang nipatay sa pamilyang Anugot ug Labajo diha sa sitio Mayana, barangay Gaas sa lungsod sa Balamban binuhatan sa New Peoples Army (NPA) 23 na katuig ang nakalabay.

Kini human ang grupong Karapatan nipasangil ngadto sa mga sakop sa 66th IB ug 341st brigade sa Philippine Constabulary kaniadto ug karun Philipphine National Police na nga maoy responsable sa pagmasaker sa pamilyang Anugot ug Labajo niadtong 1985 diha sa barangay Gaas.

“Ano ba ito ang Karapatan? They are lawyering CPP-NPA, they must be leveled as terrorist also,” matud pang Inserto atol sa press conference kagahapon sa Centcom.

Nitataw si Inserto nga mas maayo pa ang Karapatan adto modapig sa mga biktima ug mohimo’g kaugalingong imbestigasyon sa maong hitabo inay adto sila mopakita og simpatiya ngadto sa mga    NPA.

Niingon si Inserto mismo ang mayor sa Balamban nga si Alex Binghay ug ang molupyo sa barangay maoy nitug-an kanila sa gidangatan sa pamilyang Anugot ug Labajo nga giingong gipamatay sa NPA.

Ang magtiayong Saria ug Mauricio uban sa unom nila ka mga anak lakip na niini ang walo pa ka bulang anak ug ang silingang si Venancio Labajo giingong biktima sa kabangis sa rebeldeng NPA human nagdumili na sa pagsuporta sa kalihukan.

Dunay nahipos nga impormasyon ang militar nga ang pamilyang Anugot mass supporters sa NPA kaniadto ug gumikan sa kadaghan na nilang nahibaw-an sa kalihokan sa mga rebelde maong sila gipamatay.