CEBU – Na-tribukar nga dunay standing warrant of arrest sa kasong pagpanglugos og minor de edad ang suspek sa pagpamusil patay sa usa ka gitumbok nga notadong kawatan didto sa bukirang bahin sa barangay Mabuli lungsod sa Tabogon niadtong miaging adlaw.
Ang suspek nga si Brayan Garcia Sentillas, 18 , ulitawo, nga taga Mabuli nautingkayan ang rekord niini nga aduna siya’y warrant of arrest nga wala ikasilbi sa kasong pagpanglugos og 17 anyos nga silingan niya didto sa barangay Mabuli niadtong milabay’ng tuig.
Matud ni SPO4 Anecito Manloloyo ang deputy chief sa Tabogon Police Station nga nahinabi sa Banat News nga ang suspek boluntaryong misurender human makapusil- patay kang Antonieto Tagsip niadtong Martes sa hapon.
Nasayran nga ang warrant of arrest batok kang Sentillas, bahin sa pagpanglugos, giluwatan ni Bogo City RTC Judge Antonio Maregomen, niadtong miaging tuig nga niadtong tungora 17 anyos pa usab ang suspek.
Ang suspek kasamtangan na karong nagtingkagol sa detention cell sa kapolisan sa Tabogon ug gipasakaan na og kasong murder tungod sa pagpatay niini kang Tagsip ug gitakda usab kining i-presentar ngadto sa korte sa kasong pagpanglugos.