Multicab pisat sa van, 1 patay

CEBU – Patay diha dayon ang usa ka driver sa multicab nga pribado samtang napulo ang angol human matumba ug madat-ogi sa 40-footer container van sa Highway Pitogo lungsod sa Consolacion sa milabay’ng hapon.

Ang biktima mao si Jay Laude, 36, minyo, ug lumad sa sitio Corba barangay San Vicente lungsod sa Liloan driver sa D&D furniture.

Base sa imbestigasyon ni SPO3 Perfecto Paramil sa Traffic Division sa Consolacion nasayran nga nagmaneho si Raul Pananganan Jr., 30, taga Wireless dakbayan sa Mandaue sa iyang gidalang prime mover guyod ang usa ka 40-foot container van gikan sa lungsod sa Carmen padulong sa dakbayan sa Sugbu.

Matud pa ni Pananganan nga pag-abot niini sa eskina sa barangay Jugan sa Consolacion usa ka taxi ang kalit nga migawas sa dalan hinungdan nga kalit mi-brake si Pananganan.

Gumikan sa kakalit sa pag-brake niini mibabag ang container van sa pikas linya ug natumba padulong ngadto sa pribadong multicab ni Laude hinungdan nga kini napisat ug dead on the spot ang biktima.

Samtang ang napulo ka kauban niini sa trabaho ang samaran ug gidala sa tambalanan human makahiagum og gagmay’ng samad ug pangos sa kalawasan.

Dugay nakuha ang biktima gumikan sa kabug-at sa maong container van hinungdan nga gigamitan kini og mga heavy equipment gikan sa kagamhanan sa lungsod sa Consolacion ug sa Liloan.

Samtang si Pananganan dali nga mitahan sa iyang kaugalingon sa kapolisan sa lungsod sa Consolacion diin kasamtangan kining gibalhug sa detention cell.

Matud pa ni Pananganan andam siya mosagubang sa gastuhan sa biktima sanglit dili man tinuyo ang nahitabo.