Siloy dancer naghikog tungod sa gugma

CEBU – Gumikan kay wala sugta sa iyang gipanguyabang choreographer naghikog patay ang usa ka 15-anyos nga dancer sa sikat nga Siloy contingent sa barangay Poblacion, lungsod sa Alcoy niadtong Martes sa hapon.

Ang 2nd year high school Siloy Festival dancer kansang pangalan gipugngan patay nang nakit-an sulod sa iyang lawak sa ilang pinuy-anan nianang alas 5:30 sa kahapunon .

Diha sa iyang liog mao ang tumoy sa usa ka pisi kansang pikas tumoy gigaid sa sagbayan sa ilang balay.

Matud ni PO3 Agustin Romanos sa Alcoy Police Station dihang nahinabi sa Banat News nga misulti kaniya ang mga ginikanan sa naghikog nga nagduda silang gumikan sa kaguol sa naulahi kay wala kini sugta sa gipanguyabang dance instructor nila.

Gibutyag ni PO3 Romanos nga pwerte gyung gugmaha sa biktima sa iyang choreographer (kansang ngalan gipugngan usab) kinsa nagtungha sa usa ka unibersidad sa Cebu City apan nagpuyo sa Talisay City.

Gani tungod sa pagka “in-love” sa maong binatilyo sa maong dance instructor , ang premyo niyang nadawat sa pagdaog nila isip 3rd placer sa Siloy Festival nga gipasundayag atol sa Pasigarbo sa Sugbo sa Cebu International Convention Center (CICC) iyang gihurot og palit og karsones nga iyang giregalo ngadto sa iyang naibgang dance instructor.

Apan human niya kini regalohi, imbes kalipay ang iyang madawat, hilabihang kaguol na hinoon ang iyang naangkon kay sa pagpiyesta niadtong Agosto 30, sa ilang lungsod diin gipahigayon ang Siloy Festival gi-prangkahan kini sa iyang naibgan nga inamigo lang ang pagtratar niini sa ulitawo.

Gumikan sa maong kapakyasan nagpunay nalang kini og hinuktok   ilabi na dihang mipauli na sa Talisay ang dance instructor ug wala na usab niya kini ma-kontak sa cellphone.

Niadtong Martes samtang gikan kini sa eskuylahan, gisugo niini ang iyang inahan nga magpapalit og load ug paglakaw sa iyang inahan giingong diha na mahitabo ang paghikog ug pag-abot sa inahan patay na kini.