CEBU - Patay nang miabot sa tambalanan ang usa ka tinun-an sa kolehiyo human ma -hit and run sa dalan AC Cortes Ave dakbayan sa Mandaue kagahapon sa kaadlawon.
Ang biktima mao si Ryan Sagaral Ngujo, 22, residente sa Sangi New Road, barangay Pajo dakbayan sa Lapulapu, tinun-an sa Philippine State College of Aeronautics, 2nd year sa kursong Aircraft Maintenance.
Sa imbestigasyon ni PO3 Joselito Catabas sa traffic division luwan si Ngujo sa iyang motorsiklo mga ala 1:00 kagahapon sa kaadlawon padung sa dakbayan sa Lapulapu, usa ka laing motorsiklo ang mibag-id kaniya hinungdan sa pagkabagnos niini sa dalan ug napantok ang ulo niini.
Dead on arrival na kini pag-abot sa Mandaue City District Hospital.
Ang nakabag-id ni Ngujo natumba usab apan daling mibarog ug misirit og dagan palayo ug gibiyaan ang motorsiklo niini nga may plakang 7L-5785 usa ka temporary plate.
Sa gihimong follow-up ni SPO3 Apolinario Nies ngadto sa LTO field office sa dakbayan sa Lapulapu nasuta nga ang tag-iya sa maong motor mao si Abel Lazarito nga residente sa Bonifacio St. dakbayan sa Sugbu.
Giawhag sa kapolisan si Lazarito sa pag-adto sa ilang buhatan aron makuhaan og pamahayag.