C-130 crew planong tabangan sa Lapu’

Lokal nga kagamhanan sa dakbayan sa Lapulapu naglaraw nga mohatag og hinabang sa mga sakop sa Philippine Air Force nga nangamatay sa pagkahagsa sa abyong C-130 sa Samal Island sa Davao sa milabay’ng buwan.

Kini ang nasayran sa Banat News gikan ni Lapulapu City Administrator Teodolo Ybañez ug OIC SP Secretary Frank Limpangog.

Matod pang Ybañez nga iyang ipaabot ngadto kang Lapulapu City Mayor Arturo Radaza nga kasagaran sa mga biktima sa pagkahagsa sa C-130 mga residente ug botante na sa dakbayan sa Lapulapu hinungdan nga angayan lang usab kini nga kahatagan og hinabang pinansiyal ang mga pamilya niini.

 Kagahapon sa hapon nahinabi sa Banat News si Limpangog ug mipahibalo nga wala pa sila makadawat sa hangyo ni Mayor Radaza sa City Council nga nangayo og gahin alang sa maong katuyoan apan kini mipasabot nga nagpadayon ang meeting sa buhatan sa mayor alang niini.

 Karong adlawa masayran kung malakip ba sa ilang hisgutanan atol sa ilang regular session ang maong lakang .

Kadaghanan sa mga nakalas nga crew nagpuyo sulod sa Mactan Benito Ebuen Air Base ug mga botante na sa Barangay Pajo dakbayan sa Lapulapu.