Bisan paman wala pa makab-ot ang hustisya sa gidangatan sa ilang mga minahal sa kinabuhi nga giingong biktima sa kabangis sa mga rebeldeng New Peoples Army, 23 na ka tuig ang nakalabay nagmapasalamaton gihapon ug nalipay ang mga kabanay nila human mabendisyoni ang ilang mga kalabira kagahapon.
“Nalipay ug nagpasalamat kaayo ko, kay sa katapusan napahimutang na gyud ang kalag sa akong bana,” kini maoy giluwatang pamahayag ni Antonia Labajo, 54, nagpuyo karun sa usa sa mga barangay sa lungsod sa Asturias kansang bana nga si Venancio Labajo giingong apil nga gimasaker uban sa pamilyang Anugot.
Ang pamilyang Anugot giingong gimasaker sa mga NPA niadtong 1985 diha sa sitio Mayana sa barangay Gaas lungsod sa Balamban ug niadtong milabay’ng semana giugkat sa mga awtoridad human makadawat og impormasyon sa gilubngan kanila.
Si Mauricio Anugot ug asawang si Saria uban sa upat ka mga anak, duha ka mga kabanay ug Labajo gipatay sa mga gituuhang NPA ug ang military ug barangay officials na maoy milubong kanila diha sa ilang tugkaran.
Ang mga Anugot giingong mga mass supporters sa NPA apan gumikan sa kabug-at na sa gipangayo kanila sa mga rebelde kini misumbong sa awtoridad hinungdan nga sila gipatay.
Matud ni Antonia nga matag kalag-kalag modagkot nalang siya sa sam-ang sa sementeryo sa Asturias tungod kay nagtuo siyang wala mahimutang ang kalag sa iyang banang si Labajo.
Wala usab motunga sa imbitasyon ni Major Christopher Tampus tigpamaba sa Central Command ang grupong Karapatan aron makatambong sa Santos nga Misa diha sa chapel sa Centcom pahinungod sa mga biktima.