Banay sa crew sa cargo ship tabangan

Nakakita karon og kahayag nga makakuha og hustisya ang mga pamilya sa mga crew sa cargo vessel nga Edago Expedition human pasaligi ni Mayor Tomas Osmeña nga tabangan kutob sa iyang mahimo nga makab-ot ang ilang gitinguha.

Ang Edago cargo vessel nga giluwanan og 13 ka tripulante nalunod niadtong miaging Mayo 15 atol sa paghuros sa bagyong Cosme.
 Giingong gikan kini sa Mindoro ang nahisgutang cargo vessel paingon sa siyudad sa Zamboanga apan kini nalunod pag-abot sa kalawran sa Antique.

Sa trese ka mga tripulante duha lang ang gikatahong naluwas sa nahisgutang trahedya ug maoy giingong nakaasoy sa ilang gidangatan.
 Samtang ang onse nila ka mga kauban nagpabiling missing hangtud karon hinungdan nga bisan kinsa na lang ang giduol sa mga kabanay nga makatabang kanila.

Si Marietta Conejos, asawa sa crane operator sa barko nga si Andres Conejos niingon nga wala magpakabana kanila ang tag-iya sa cargo vessel.

“Nagpakisayod mi sa ilang buhatan pero dili man mosulti kung duna ba silay gihimo nga makit-an ang ilang mga crew sa barko,” sumala ni Marietta.

“Gitanyagan mi nila nga hatagan og P30 mil kada crew, tigi-tigion pa unya dala na ana ang tanan nilang benipisyo ug sweldo,” dugang ni Conejos.

Gihatag ni Osmeña ngadto kanila isip abogado ug makaatiman sa ilang mga reklamo mao si Konsehal Gerardo Carillo.

Gipadayag sa konsehal nga dako ang posibilidad nga ilang pasakaan og kaso ang tag-iya sa barko kung dili atimanon niini ang mga reklamante.

Karong adlawa, pakigtagboan ni Carillo ang pamilya sa mga tripulante aron sabutan ang kaso nga ilang ipasaka batok sa Edago.

Gipadayag sa konsehal nga base sa iyang nadawat nga reklamo, dunay nahimong pagpabaya ang tag-iya hinungdan nga nalunod ang barko.