Gipatay sa merkado

Gipusil-patay ang usa ka 25-anyos nga lalaki sa iyang gikalalis samtang namalit kini og sud-an alang sa panihapon sa merkado publiko sa barangay Poblacion lungsod sa Ronda niadtong Lunes sa alas 7:00 sa gabii.

Ang biktima nga nakaangkon og tulo ka samad pinusilan ug namatay mao si Marvic Requilme, molupyo sa barangay Ilaya sakop sa maong lungsod.

Samtang ang suspek mao ang usa ka Pablo Villafuerte alyas Salvo, molupyo sa barangay Poblacion sa samang lungsod.

Matud ni PO1 Roman Cañete Jr., sa Ronda Police dihang nahinabi sa Banat News paingon sa merkado ang biktima dihang nakit-an sa suspek nga niadtong tungura nag-inom kauban sa mga barkada niini sa usa sa mga tindahan.

Ang biktima ug ang suspek gikatahong duna nay di maayong relasyon ug dihang nagkita niresulta kini sa ilang init nga panaglalis ug nisangpot sa pagpamusil.

Ang biktima nakaangkon og tulo ka samad pinusilan usa sa ilok sa walang bahin sa lawas ug gituohang nilapos ang bala sa kasing-kasing niini ug giusban pa kini og pusil sa walang paa ug bagtak dihang paingon pa gyud nga mohamag ang biktima.