Ginang gidunggab sa nalisoan

Usa ka ginang sa panimalay nabulit sa mga samad sa lawas dihang gipanunggab kini sa iyang silingang lalake nga nalisoan sa maayong pangisip didto sa iyang balay sa sitio Maharlika, barangay Subangdaku, Mandaue, City kagahapon sa alas 4:00 sa hapon.

Ang biktima mao si Bianca Sagalili, 30, minyo, samtang ang suspetsado mao si Mateo Bayani, 18, ulitawo, nga iyang silingan.

Si SPO1 Alfredo Andales sa Presinto 2 sa Subangdaku Police Station nga nahinabi sa Banat News miingon nga diha sa sulod sa lawak sa ilang balay ang biktima dihang kalit lang kining gisaka sa suspetsado nga nagdala og kutsilyo.

Sa walay daghang langas gidumog dayon ang biktima ug gipanunggab sa nagkalainlaing bahin sa lawas, apan misukol ang biktima bisan samaron na siya.

Dihang nailog ang kutsilyo, mibawos usab ang biktima og panunggab ngadto sa suspetsado hinungdan nga samdan usab sa nagkalainlaing bahin sa lawas ang naulahi.

Dali nga gidala ang biktima ngadto sa Vicente Sotto Memorial Medical Center, samtang ang suspetsado didto ihatod sa Perpetual Soccour Hospital, tanan sa dakbayan sa Sugbo.