Usa ka traysikad driver ang patay nang nadangat sa tambalanan human kini gibuko-buko pagdunggab sa wa mailhing mamumuno niadtong Domingo.
Usa ka Bernardito Leyson, 37, residenti sa sitio Mahayahay II, barangay Pasil ning dakbayan gidunggab sa nag-inusarang suspetsado samtang mopauli na unta kini sa ilang pinuy-anan.
Si Leyson gideklarar nga DOA sa mga doctor sa CCMC human wala na makaagwanta sa mga samad nga naangkon sa tuong bahin sa iyang buko-buko gikan sa wala matinong mahait nga hinagiban.
Sa imbestigasyon sa Homicide Section nila ni SPO2 Rey Cuyos ug mga kaubanan ang biktima padulong na untang mopauli paingon sa panimalay sa iyang amahan dihang gisundan sa mamumuno ug gidunggab sa buko-buko.
Ang biktima gikan sa panimalay ni Elen Quirante aron makig-uliay sa buot gumikan kay nagkabangi kini sa bana ni Elen nga si Pete. Wala pa usab matino kung si kinsa ang nagkainteres sa kinabuhi sa biktima.
Samtang sa pikas bahin gi-swerte si Fernando Aninio Paller, 48, human makalingkawas sa tinong kamatayon dihang gidunggab niadtong miaging hapon diha sa Back Sacred Heart School, barangay Lorega-San Miguel.
Si Paller nakaangkon og samad dinunggaban sa tuong abaga dihang gidunggab ni Dennis Quiroga, 33, nagpuyo sa nahisgutang lugar.
Si Paller nitug-an sa mga imbestigador sa kapulisan nga mga alas 5:45 sa hapon niadtong miaging adlaw nibisita siya sa iyang anak nga babaye si Candy Paller.
Dihang mopauli na siya kalit nga miduol ang suspek ug gidunggab ang iyang abaga hinungdan nga dali siyang mikaratel og dagan, gikatahong nasuko ang suspek sa biktima tungod sa pasangil nga gibinastosan ang iyang anak sa biktima.
Ang suspetsado nitahan human sa pagpanunggab ngadto na sa mga ni-responding police.