Mga hinabang sa Kapitolyo sa biktima sa Frank, C-130, ‘Stars’ gitunol

Gipanghatagan kagahapon og hinabang pinansyal sa kagamhanan sa probinsya sa Sugbu ang mga kabanay sa biktima sa kalamidad, duha ka kanhi sakop sa New Peoples Army , kabanay sa biktima sa nalunod nga MV Princess of the Stars ingon man ang nahagsang C-130.

Matud ni Gobernador Gwendolyn Garcia andam niyang barugan ang iyang gipanulti, ilabi na kung alang sa kalinaw, sa kalipay, sa kasakit ug sa hagit kanunay siya magpaluyo.

“Sa kanunay, the Cebu provincial government will stand by its word. In times of peace, joy, pain and challenges, we are here to stand beside you…to be strong for you if needed,” nagkanayon ang gobernador.

Apil sa gihatagan og hinabang pinansyal mao ang kanhi mga rebelde gikan sa dakbayan sa Danao nga sila si Marcial Prieto ug Ruel Tañana kinsa nakadawat og P30,000 matag usa kanila.

Laing 24 ka mga kabanay sa nalunod nga barko sa Sulpicio Lines ang gihatagan usab og tag P10,000 matag usa kanila.

“Kitang tanan, angay lamang nga magkuyog, magtinabangay alang niining pinalangga tang Sugbu,” nidugang si Garcia.

Siyam ang nakadawat og laing P10,000 sa mga kabanay sa nahagsa nga C-130 plane.

Samtang ang lungsod sa Catmon gihatagan usab og P100,000 alang niadtong naapektahan sa landslide.

Ang lungsod sa Daanbantayan nakadawat og P1 milyon nga hinabang pinansyal sa Kapitolyo sanglit ang maong lungsod maoy naapektahan og maayo sa bagyong Frank ug kini gidawat ni Bise Mayor Ma. Luisa Loot.

Gipahibalo ni Garcia iyang gihatagan ang Daanbantayan sa maong kantidad niadtong Sabado atol sa malampusong Haladaya Festival ug kini gipasalamatan ni Mayor Sun Shimura.