9 biktima sa NPA naugkat

Human sa 23 ka tuig naugkat na gyud ang siyam ka miyembro sa usa ka pamilyahang giingong biktima sa mga rebeldeng New Peoples Army sa usa ka mass grave diha sa sitio Mayana barangay Gaas, lungsod sa Balamban.

Ang grupo nila ni Lt. Col. Raymundo Bañares ug Cebu Provincial Police Office director, Sr. Supt. Carmelo Valmoria inubanan sa Scene of the Crime Operations nikubkob sa dapit diin gikareport nga gipanglubong ang pamilyang Anugot.

Niadtong Agosto 27 nakumpirmar sa mga sakop sa 78th IB ang lokasyon sa gilubngan sa mga biktima nga giingong mga mass supporters sa NPA niadtong dekada 80.

Lakip sa mga narekober diha sa usa ka bangag mao ang mga sinina, banig, mga alahas, relo ug uban pa samtang dunay mga bukog nga nahilis na gyud gumikan sa kadugayon.

Usa ka kanhi konsehal sa barangay Gaas nga si Alejandro Nebria maoy mitug-an sa maong mass grave diin gipang-massacre ang pamilya ni Mauricio Anugot.

Lakip sa gipatay mao ang asawa ni Mauricio nga si Saria, mga anak nilang ginganlan og Peng, Titing, Marlyne nga usa pa ka tuig, usa ka unom ka buwang anak ug tulo nila ka wala mailhing kaliwat nga nibisita sa maong pamilya niadtong Oktubre 9, 1985 sa alas 9:00 sa gabii dihang nahitabo ang massacre.

Gikatahong nasuko ang mga NPA sa pamilyang Anugot gumikan kay di na kini mosuporta kanila, gikatahong ang pamilya tighatag og pagkaon ug pasilongan sa mga NPA niadtong mga tuiga.

Matud pang Nebria sa iyang nahinumduman sila maoy nilubong sa mga patay’ng lawas sa mga biktima uban sa militar ug mga residente human nila makit-ing pulos na sila patay, gikatahong moabot tunga sa adlaw nga lakaw ngadto sa lungsod kung ilaha pa kining dad-on.

Dugang pang Nebria ang pamilyang Anugot wala na mosugot sa gipangayo sa mga NPA nga revolutionary tax sanglit bisan na ang ilang mga hayupan ug kan-unon sa ilang pamilya buot pang kuhaon sa mga rebelde.

Tungod sa kahadlok nisumbong si Anugot ngadto sa kanhi barangay kapitan nga si Rufino Oberez apan paglabay sa tulo ka adlaw nakit-an nalang nga patay na ang tibuok banay.

Sumala pa nga gikuyogan sa guide nga si Verancio Labajo ang mga NPA nga gipanguluhan sa usa ka Ka Willy Abatayo sa balay sa mga Anugot apan human patya ang tibuok banay gipatay usab si Labajo, gidudahang gipusil ug gitigbas ang mga biktima lakip na mga bata.

Usa sa mga anak sa mga Anugot nga si Mario kinsa 22-anyos na niadtong higayuna wala maapil sa masaker tungod kay niadtong tungura diha siya sa gawas nangasilyas.

Dugang pa ni Nebria, niadtong 1986 sila si kapitan Rufino Oberez, Evermo Dumonug, Pedro Sabate nga mga sakop sa nabungkag nang Citizens Home Defense Force (CHDF) gipasakaan og kaso sa legal fronts sa NPA ug maoy ilang gitumbok nga suspek sa masaker.

Human sa upat ka tuig nga pagkabilanggo naabswelto sila dihang ang anak sa mga Anugot nga si Mario mibalik human sa pagtago-tago ug metistigong nasaypan ang upat ug mga NPA gyud ang mipatay sa iyang mga ginikanan ug mga igsuon.

Si Lt. Col. Bañares nanawagan sa mga lumolopyo nga kung duna sad silay nahibaw-ang mga tawong gipamatay sa mga NPA ug ang lokasyon sa gilubngan ipahibalo lang kini ngadto sa awtoridad.

Kini aron usab maugkat kadtong mga nabiktima sa NPA ug ilang matabangan ang mga pamilya niini sa pagpangita’g hustisya.

Samtang sa iyang bahin si Sr. Supt. Carmelo Valmoria ang hepe sa kapulisan sa lalawigan sa Sugbu nitataw nga mohimo sila og case buildup uban sa militar alang na sa posibleng pagpasaka’g kaso sa mga responsable.

Sa iyang bahin sa Mayor Alex Binghay nitug-an sa mga tigbalita nga mosubra pa sa 100 ka gatos pa ang iyang nahibaw-an nga gipanglubong sa maong lugar atol sa kalihukan sa mga rebelde dihang siya pay bise mayor niadtong higayuna.

Ang mga bukog toa na karon sa buhatan sa SOCO-7 lab alang na sa paghipos niini.