Bukton sa Koreano nahulbot pagkahagbong sa sixth-floor

Nahulbot ang tibuok walang bukton sa usa ka Koreano ug nagpabiling nagsangit sa koral kinsa namatay human kini natagak gikan sa ika-unom nga andana sa usa ka hotel sa barangay Gun-ob dakbayan sa Lapulapu kagahapon sa kaadlawon.

Ang Koreano mao si Park Sung Su, 27, kasamtangang nag-okupar sa usa ka lawak sa maong hotel sa dakbayan sa Lapulapu kinsa nag-ubo na nga way sinina sa taas nga bahin diha sa gawas sa tiilan sa konkretong paril sa maong hotel ug wala nay kinabuhi.

Base sa pasiunang imbestigasyon ni SPO2 Rolito Jumao-as sa homicide section nasayran nga gikan nanuroy si Park ug ang iyang uyab nga si Yang You Sun sa dakbayan sa Sugbu sayo nianang gabhiuna.

Ug sa ilang pag-uli sa maong hotel mga alas 2:23 kagahapon sa kaadlawon pipila ka oras nasayran nalang nga si Park napalgang patay nga anaa sa taas nga bahin sa koral sa maong hotel nga nasangit sa railings ug wala nay kinabuhi.

Naglibog pa karon ang kapolisan sa hinungdan sa pagkahagbong ni Park sanglit walay nakakita bisan na mismo ang uyab niining maoy iyang kauban niadtong tungura.

Matod pa ni Yang (uban sa iyang interpreter) wala siya masayod kung unsay problema sa iyang uyab gumikan kay wala kini makahisgot sa matag sila magkuyog sukad nga miabot sila niadtong Agusto 1 ning tuiga gikan sa Korea, gani ikaduha pa nila ka adlaw sa pagpuyo sa maong hotel.

Sa pakisusi ni SPO2 Rolito Jumao-as nga walay kabanay ug uban pang mga kaila si Park diha sa maong hotel ug labaw nang walay nakakontra sa milabay'ng mga adlaw.

Gumikan niini padayon pa gihapon ang ilang imbestigasyon sa maong kaso ug gisusi usab nga posibleng aksidente o nituyo paghikog ang maong langyaw pinaagi sa pag-ambak sa bintana.

Hinuon base sa hitsura sa lawas niini gawas sa kadaut nga nahiaguman sa pagkatagak walay nakitang timailhang may foul play nga nagpaluyo sa kamatayon niini apan gikatakdang ipailawom pa ang lawas niini sa awtopsiya.