Traffic enforcer nangulata

Gireklamo karon ang usa ka traffic enforcer nga sakop sa Cebu City Traffic Operations and Management (Citom) human mangulata sa iyang dinakpan.

Ang gireklamong traffic enforcer nga giingong abusado ug walay kukaluoy nga nidapat sa iyang dinakpan mao ang usa ka Metodio Torillo Jr. kinsa gitumbok sa nabun-og nga si Rodolfo Alcosaba, 24, molupyo sa sitio Baka, barangay Apas ning siyudad sa Sugbu nga maoy nidagmal kaniya.

Matod ni Alcosaba nga samtang siya nagmaneho sa iyang motorsiklo diha sa Gov. Cuenco Ave. duol sa Country Mall niadtong miaging adlaw kalit lang nisira sa iyang agianan ang traffic enforcer nga nagsakay usab sa iyang motorsiklo.

Tungod sa kakusog sa iyang dagan wala na madala sa iyang brake nga makahunong ug nadasmagan ang gimanehong motorsiklo ni Metodio.

Ang toolbox sa motor sa traffic enforcer maoy naigo sa gimanehong motorsiklo ni Alcoseba ug silang duha pulos nangatumba sa ilang gisakyan.

Nagkanayon ang reklamante nga sa pagbangon ni Metodio kalit lang kining niduol kaniya ug walay daghang estorya siya miingong gipatiran siya niini.

Wala pa matagbaw ang traffic enforcer, si Alcosaba nialigar nga siya gisukmag hinungdan nga siya nakaangkon og mga bun-og sa kalawasan.

Nagpakurasyon na ang reklamante aron dunay ikapakitang kamatuoran alang usab sa tukmang kaso nga iyang isang-at batok sa traffic enforcer.

“Wala may problema og iya ra kong dakpon bisan og dili to akong sayop pero dili unta siya mangulata,” sumala ni Alcosaba.

Gusto sa reklamante nga matangtang si Metodio sa pagka-traffic enforcer sa tuyo nga makuha-kuhaan ang mga abusadong traffic enforcer sa Citom.

Nagplano si Alcosaba nga modangop kang Konsehal Yayoy Alcoseba ug ni Konsehal Sylvan Jakosalem nga pulos usab mga sakop sa Citom board.

Buot sa reklamante nga katabangan sa maong mga konsehal nga mahatagan og hustisya ang pagkulata sa traffic enforcer kaniya.