20 anyos patay sa dengue

Lain na usab nga kinabuhi ang nakalas sa sakit nga dengue niining buwana dinhi sa dakbayan sa Sugbu.

Ang katapusang nabiktima ug namatay mao ang usa ka Mylene Espiritu, 20, dalaga ug molupyo sa dalan A. Lopez ning siyudad.

Si Espiritu mao na ang ikaduhang nabiktima sa dengue niining buwana dinhi sa dakbayan nga wala matabang sa mga mananambal ug namatay.

Ang maong insidente nakapaalarma sa pipila ka konsehal sa siyudad partikular na ni Konsehal Arsenio Pacaña tungod kay ang gidangatan ni Espiritu giingong nagpakita lang nga walay gipili ang dengue ug mahimo nga ang tanan matakboyan sa maong sakit.

Taliwa niini, mapasigarbuhon gihapong gitaho ni Konsehal Gerardo Carillo ngadto sa City Council nga nagkamenos na ang dengue cases sa siyudad.

Sa data nga nakuha sa konsehal gikan sa City Health Department, 66 lang ang nabiktima sa maong sakit niining buwana nga giingon ni Carillo nga mas ubos itandi sa susamang period sa miaging tuig nga dunay 352 ka dengue cases.

“We have only 66 cases this month compared to the 352 last year of the same period, we have lower incidents this month alone,” sumala ni Carillo.

Apan wala matagbaw ang City Council sa maong kalambuan tungod kay duna gihapoy nabiktima sa nahisgutang makamatay nga sakit.

Tungod niini, ipatawag sa konseho sugod sa sunod semana ang mga barangay ilabi na kadtong dunay labing daghan og kaso sa dengue.

Gustong masayod ang konseho kung unsa ang gihimong kampanya sa maong mga barangay pagpakigbatok sa nahisgutang sakit.

Nasayran nga sa 20 ka mga barangay sa dakbayan nga gipangayoan og mga programa batok sa dengue, tulo pa lang niini ang nakasumitir sa konseho.

Kini mao ang barangay Tisa, Basak-Pardo ug Barrio Luz nga nalakip sa listahan sa City Health nga dunay labing daghan og kaso sa dengue.