Hain napunta ang clothing allowance?

Nangreklamo na sa Banat News ang ubay-ubay nga mga kawani sa Cebu City Hall tungod sa nadelatar nilang uniporme.

Matud sa usa ka empleyado nga dili gustong magpaila nga niadto pang buwan sa Marso gikaltasan og usa ka libo ka pesos ang ilang clothing allowance.

Kini aron maoy ibayad sa upat ka polo shirt nga uniform, apan hangtud karon giingong wala gihapon mahatag ngadto kanila.

“Nahibulong mi kay kadugay na adto, hapit na man lang pud mahuman ang tuig nga para man unta to karong tuiga,” suma sa tinubdan.

Laing kawani nga nahinabi ning tagsulat ang nagduda nga gituyo paglangay ang bayad sa ilang uniporme tungod sa personal nga katuyoan.

“Nagduda ko nga ila unang gipa-time deposit ang kwarta aron makaganansya sila sa interes,” nagkanayon ang laing tinubdan.

Sa nasayran, ang kagamhanan sa dakbayan sa Sugbu duna karoy 4, 585 ka mga empleyado nga hataganan og uniporme.

Kini nagpasabot nga napundo ang kuwarta sa mga kawani sulod na sa pipila ka buwan nga mosumada og kapin sa P4.5 milyones.

Nasayran usab sa Banat News nga sa miaging tuig nadelatar gihapon ang paghatag sa uniporme ngadto sa mga kawani.

Ang mga empleyado sa City Hall giingong dunay P4 mil nga ihatag sa mga kawani isip clothing allowance matag tuig.

Buot untang kuhaan og reaksyon sa Banat News sa nahisgutang problema si City Administrator Bimbo Fernandez apan kini nakalakaw na dihang giduaw ning tagsulat sa iyang buhatan ug dili usab motubag sa iyang mobile phone.

Gusto sa mga kawani sa City Hall nga masayod kung unsay tinuuray nga hinungdan sa maong kalangan aron mapapas ang ilang mga pagduda.

“Sige na man lang gud na, unya ra nila ihatag ang uniform og hapit na mahuman ang tuig,” nagkanayon ang laing kawani.