Gipusil  sa igsoon agtang  paksit

Gumikan lang sa bangi sa yuta,napaksit ang agtang sa usa ka maguwang dihang giingong giunay kinig pusil sa iyang manghod  didto sa Sitio Tangke barangay Marmol lungsod sa Tuburan niadtong Domingo sa alas 6:30 sa gabii.

Ang biktima mao si Eduardo Cagay Jr., 32, minyo, nga taga Marmol samtang ang suspetsado mao ra usab ang iyang manghod nga si Clarito Cagay, 28, minyo nga silingan ra usab sa biktima.

Nasayran sa  kapulisan nga ang biktima may gipalit sa tindahan duol sa ilang balay dihang pagpauli niini kalit nga gipusil sa suspek.

Ang asawa sa biktima nga si Lizel Cagay maoy nakakita kang Clarito nga  mipusil sa iyang bana nga nanukad sa taas sa ilang balay.

Hinuon tungod kay tapsing raman, igo lang napaksit ang agtang sa biktima ug dali ra kaayo kining nalibre  sa Tuburan District Hospital.

Nasayran nga wala magkasinabot ang maong managsuon bahin  sa kaugalingong yuta sa ilang ginikanan nga ilang gitikad.

Sa pagkakaron gipangita na sa kapolisan ang suspetsado human kini mosibat gikan sa ilang lugar.