Tanod sa San Antonio imbestigahon – Kapitan

Ipaubos na sa imbestigasyon ang pipila ka mga tanod sa barangay San Antonio sa dakbayan sa Sugbu nga gipasanginlang nangulata sa ilang dinakpan.

Ang barangay kapitan sa San Antonio nga si Allan Masecampo nipahibawo nga ila nang sugdan ang himoon nilang pakisusi ug mipasalig kini nga iyang tangtangon sa pagka-barangay tanod kadtong mamatud-an unyang sad-an.

“Duha na ka barangay tanod akong gitangtang diri ug gipapahawa tungod kay nakahimo og kasaypanan,” sumala ni Masecampo.

Wala hinoon motug-an ang kapitan kung kanus-a nila hingpiton ang ipahigayong imbestigasyon ngadto sa ilang mga barangay tanod.

Ang hepe sa tanod sa barangay San Antonio uban sa pipila ka mga sakop niini maoy gitumbok ni Sylvia Alcantara pinaagi usab sa iyang live-in partner nga si Jimmy Fornolles (dinakpan) nga maoy gikulata.

Gidakop si Fornolles sa mga barangay tanod niadtong Domingo sa gabii tungod kay kini gituuhang naghupot og ginadiling drugas.

Giingong nakuhaan og usa ka paketeng may sulod nga gidudahang shabu si Fornolles apan kini gihimakak usab sa live-in partner niini nga si Alcantara.

  Nagpatabang na si Alcantara ngadto kang Cebu City Councilor Augustus Pe Jr, aron mapaubos sa kinalit nga drug test ang mga tanod sa barangay San Antonio.