Baho nga tubig sa kanal  gireklamo

Mga residente sa sitio Asan, barangay Cansojong mireklamo tungod sa bahong tubig nga mogawas gikan sa kanal gikan sa usa ka  factory diha sa lugar paingon ngadto sa dagat.

Kagahapon sa buntag si Konsehal Bernard Odilao kinsa tsirman sa komitiba sa kalikupan uban kang Cedronico Olandang Jr. sa City Planning Development Coordinator (CPDC) ang misusi sa lugar.

Si Odilao sa pakighinabi niini sa Banat News kagahapon nagkanayon nga ang nakitang sementadong kanal nga paingon sa dagat gipabuhat sa maong factory ug mi-tap sa maong kanal ang apartment ug ang bag-ong edipisyo nga gitukod diha sa lugar.

Matud ni Odilao nga gikuhaan niya og sample ang maong tubig ug ipa-eksamin niya kini tungod kay posibleng makadaot ang maong hugaw nga tubig ngadto sa mga isda ug uban pang mga pagkaon nga naggikan sa dagat ug lakip nga apektado niini ang panglawas sa mga molupyo.

Si Fe Gonzales ang kalihim sa Fishermen Sea Ecological Care (FISECA) maoy usa  sa nitaho kang Odilao kabahin sa maong insidente tungod kay nakasingo usab sila sa kabaho sanglit ang ilang buhatan naa mahimutang sa daplin sa baybayon sa maong barangay.

Si Glenda Bacaltos, 33-anyos, residente, ug Abraham Cagulada, 53, mga residente sa lugar mibutyag sa Banat News kagahapon sa buntag nga ang maong baho nga tubig ang miawas usab diha sa karsada dihang mibunok ang kusog nga uwan.

Ang konsehal midugang nga ipatawag niya sa daling panahon ang tag-iya sa nahisgutang factory ug ang mga opisyal sa barangay aron matuki ang nahisgutang problema.