'Gang member' gi-salvage

Usa ka 17-anyos nga lalaking giingong sakop sa gang ang gituohang gi-salvage sa karibal nga gang ug napalgang patay nga nagbuy-od sa daplin sa dalan paingon sa usa ka beach resort sa barangay Agus, dakbayan sa Lapulapu nga may gapos ang mga kamot ug mga tiil.

Napalgan kini sa pipila ka lumolupyo pasado alas 5 na ang takna kagahapon sa buntag.

Ang walang bukton sa biktima nga may patik nga “BK Crips gang”  gigapos og pisi nga nylon, gibinaklid ug ang tiil gigapos usab og itom nga bakus.

Sa taliwala sa nagbuy-od nga patay’ng lawas sa biktima napalgan ang long band paper nga gisulatan og mga pulong nga nagkanayon: “ayaw kog sunda Crips gang gipatay ko sa Bloods gang.” 

Si PO3 Joseph Damasco sa homicide section nga nahinabi sa Banat News miingon nga ang biktima nag-brief nalang nga kolor itom gituohan nga gituok sa wala pa dunggaba ug gipusil sa ulo, may itom usab nga t-shirt nga gilibod diha sa liog niini.

Wala pa mailhi sa kapolisan ang mga mamumuno.

Nailhan na sa kapolisan ang biktima human matan-aw sa mga kabanay diha sa Rolling Hills sa Banilad, dakbayan Mandaue, kini taga barangay Talamban sa dakbayan sa Sugbu.

Ang pipila ka residente sa maong dapit misugilon sa kapolisan  nga alas 12 sa tungang gabii nakadungog sila og tulo ngadto sa upat ka mga boto nga gituohan lamang nilang rebentador.

Usa ka kabhang sa kalibre .45 ug pito ka pulgadang kutsilyo nga ilang gituohang maoy gigamit sa pagpatay sa biktima ang nakit-an diha sa crime scene.