Pagpangayo og umento sa teachers gisaway

Nakasaway si Cebu City Schools Division Superintendent Doctor Lorna Rances sa iyang sakop nga mga magtutudlo nga nidemanda og usbaw sa suhulan.

Ang mga magtutudlo nga giingong mga sakop sa Teachers Dignity Coalition (TDC) mipadayag sa ilang tinguha nga mapadali ang ilang salary increase.

Ilang gusto nga maghiusa ang tanang magtutudlo aron mapadali ang pag-aprubar sa balaudnon nga maghatag kanila og P9 mil nga umento sa suhulan.

Apan alang kang Rances, kini wala na kinahanglana tungod kay ang kalihim mismo sa Department of Education (DepEd) nga si Jesli Lapus naninguha usab nga maaprubahan ang nahisgutang balaudnon.

“Dili man na angayang ralihan kay ihatag man gyud na sa mga magtutudlo kung naay kwarta, and aside from that, ang among secretary of education hugot man usab nga nag-lobby ana sa kongreso, nganong mag-rally pa man nga si secretary Jesli Lapus pabor man ana nga balaudnon,” sumala ni Rances.

Ang labaw nga gikabalak-an sa City Schools Division Superintendent mao ang pagsulod sa militanteng pundok sa maong kahugpungan sa mga magtutudlo.

Tungod niini dili modasig si Rances sa ubang mga magtutudlo sa dakbayan nga magpasakop sa nahisgutang grupo.

“Dili ko mo-encourage sa mga teachers nga muapil ana kay kuwang man gani ning among oras itudlo, mo-focus lang ta sa pagtudlo, ato lang tinud-on tawon ang pagtudlo sa mga tinun-an kay iyawat na lang nga moasenso ta ning atong kalibutan nga daghan og problema,” matod ni Rances.

Nasayran nga ang Committee on Basic Education sa Ubos Balay Balauranan nga gipanguluhan ni Kongresista Del de Guzman niaprubar na sa maong tinguha.
 Kini giingong ubos usab sa paningkamot ni Lapus kinsa usa usab ka kongresista kaniadto sa wala pa itudlo isip kalihim sa DepEd.

Ang Senate Bill 2408 nga alang sa paghatag og umento sa suhulan sa mga magtutudlo naaprubahan na sa ikatulo ug katapusang pagbasa sa senado.

Samtang ang counterpart niini nga mao ang House Bill 4734, giingong gi-calendar na usab alang sa pagtuki sa hawanan sa kongreso.