Jailguards maoy tigpalusot

Mga jailguards sa bag-ong Cebu City Jail maoy gitumbok nga kakunsabo sa mga tigpalusot og shabu ug uban pang kontrabando diha sa sulod sa maong pasilidad.

Kini maoy nigawas sa resulta sa hiniusang imbestigasyon sa Cebu City Police Office Criminal Investigation and Intelligence Branch ug sa Jail Warden sa maong prisuhan human mi-execute og affidavit ang tulo ka mga dinakpan sa CIIB nga mga dispatchers diha sa gawas sa maong bilanggoan.

Si Sr. Insp. George Ylanan, hepe sa CIIB sa pakighinabi sa Banat News kagahapon nitug-an nga sila si Joseph Tabada, Gil Tampus ug Isidro Llanos pulos taga barangay Kalunasan nga ilang gidakop niadtong milabay'ng Sabado miluwat og affidavit ug mihingalan sa mga jailguards nga maoy nalambigit sa pagpalusot.

Midumili hinuon paghingalan si Ylanan kung si kinsa ang maong mga jailguards apan matud pa niya nga dugay na nila silang gipanid-an tungod sa mga nadawat nga mga reports kaniadto apan diha na kini makumpirmar human sila mopahigayon og imbestigasyon ug surveillance.

Kahinumduman nga gikasuko ni Bise Mayor Michael Rama ang resulta sa ‘greyhound operation’ sa Jail Warden nga si Supt. Efren Nemeño human walay bisan usa ka paketeng shabu ang nasikop niadtong milabay'ng bulan sa Hulyo gawas lang sa mga drug paraphernalia nga dili katuohang dad-on diha sa sulod nga walay shabu nga gamiton.

Una nang mipasangil si Tampus ug Tabada human sila dakpa tungod sa kasong paglapas sa City Ordinance sa Anti-Dispatching nga sila gipangpuspusan ni Ylanan og bangko ug logbook sa ulo, kini hugtanong gipanghimakak sa opisyal.

Nasayran nga daan nang nagduda ang jailwarden sa city jail nga dunay kalambigitan ang tulo sa mga pagpalusot base usab sa intelligence reports nga iyang nadawat hinungdan nga ilaha kining gipanid-an kung si kinsa ang ilang kakunsabo diha sa sulod.

Ang tulo parehong nangangkong mobantay sa mga butang sa mga “dalaw” kon bisita sa mga priso bugti sa P10 matag butang nga ilang bantayan, miangkon usab silang dunay mga higayon nga sultihan silang daan sa mga bisita nga dunay laing tawo nga mo-claim sa ilang butang ug maoy modala sa claim tag.

“Nisulti sila base sa ilang affidavit nga naay mga jailguards nga involved, silay (dispatchers) binlan sa bisita unya kuhaon og jailguards,” sumala pang Ylanan.

Kini mao na ang mga jailguards nga gidudahang tigpasulod sa kontrabando diha sa maong prisuhan.

Si Nemeño dihang gihinabi sa Banat News mitug-an nga nangayo siya og ayuda sa PNP aron mailhan kung si kinsa sa iyang mga sakop ang nalambigit sa binuang sanglit dihang sila mismo maoy nihimo niini dali silang nabantayan.

“Na-confirm namo nga naay involvement ang mga dispatchers diha sa gawas ug naay mo-pickup nga mga personnel gikan dinhi sa sulod,” asoy pang Nemeño.

Matud pang Nemeño human makumpleto ang ilang imbestigasyon ug mga dokumentos iyaha kining ipasa ngadto sa ilang rehiyonal nga buhatan aron mapasakaan og kasong administratiba ang maong mga jailguards.

Ang mga bisita ug personnel mag-agi gyud sa searchers sa Barangay Intelligence Networks sa CIIB ug sa mismong mga gitudlong searchers sa city jail apan ang mga BIN matud pang Nemeño mahadlok mo-search sa jailguards samtang lipat-lipaton ra sad ang ubang searchers.