Pagtangtang sa VAT sa electric bill OK

Gihangop ni Cebu City Councilor Sylvan Jakosalem ang balaudnon nga gipalabang ni Senador Juan Ponce Enrile nga maghatag og exemption sa mga panimalay nga mogamit og elektrisidad pagbayad sa Value Added Tax (VAT).

Apan kini alang ra hinoon sa mga balay nga mokunsumo og dili molapas sa 250 ka kilowatt hour matag buwan.

Kung maaprubahan ang proposal ni Enrile makadaginot og average nga P148 ang matag pamilya nga makapahimulos niini.

Ang VAT sa kuryente nagkahulugan og P.60 nga dugang bayranan sa matag kilowatt hour alang sa residential consumer.

Alang kang Jakosalem, dako na og matabang ang maong kantidad sa inadlaw-adlaw nga panginahanglan sa matag pamilya.

Kini ilabi na niadtong mga pamilya nga nahamutang sa gitawag og “lower middle income bracket and below.”

Ang konsehal nga maoy chairman sa Committee on Energy sa City Council, malaumon nga maaprubahan ang balaudnon ni Enrile.

Gani mas pabor ang konsehal nga ilakip pag-amendar sa mga magbabalaud ang kontrobersyal nga Oil Deregulation Law.

Alang sa konsehal dakong perwisyo ang nahatag sa nahisgutang balaud ngadto sa katawhan ug wala kini moserbisyo sa katuyuan.

Nagtoo si Jakosalem nga nagsabot-sabot na lang ang mga kompanya sa lana sa nasod sa presyo sa ilang mga produktong petrolyo tungod sa maong balaud.

Ang pagbasura sa Oil Deregulation Law dugay na nga gipangayo sa mga militanteng pundok tungod usab sa susamang pagtoo.