Prayer-rally gilusad ni Corro

Malinawon ug malampuson ang gipahigayong “prayer and thanksgiving rally” ni kandidato pagkamayor Augusto Corro sa Daanbantayan kagahapon sa hapon.

Gitambungan sa mga 800 kapin ka mga dumadapig ni Corro ug sa iyang kandidato pagka-Bise Mayor Jose de Leon ang ilang mga pasalamat sa mga lungsoranon  nga mipaluyo kanila sa pagpangita sa hustisya.

Ang maong pasalamat ug pangaliya maoy halad sa partido nila ni Corro  dihang  migawas na ang desisyon sa ilang petisyon batok sa resulta sa piniliay niadtong 2007 didto sa Daanbantayan.

Segun sa  maong desisyon nga gipakanaog ni Regional Trial Court Judge Antonio Maregomen sa Branch 61 sa Bogo City, milabaw si Corro og 3,391 botos  batok  sa iyang kaatbang  nga kasamtangang Mayor  Sun Shimura, samtang si de Leon milabaw usab og 1,311 batok kang Bise Mayor Maria Loot.

Base sa rekord sa korte, ang katibuk-ang boto ni Corro mikabat og 13,915 batok kang Shimura nga 10,524; samtang si de Leon may katibuk-ang boto nga 12, 903  batok kang Loot nga 11,592.

Sa laing bahin sila si Loot nangandam na usab sa ilang protest rally nga ilusad karong adlawa diin ang ilang mga suporters  magsul-ob og T-shirt nga pula nga markahan og “asa na ang among boto” sa atubangan niini.