Balay  sa Ronda gi-arson?

Usa ka balay nga giingong gituyo pagsunog sa mga tawong wala hiilhi ang naugdaw  didto sa Silay, barangay Butong, lungsod sa Ronda niadtong Huwebes sa alas 9:00 sa  gabii.

Ang balay nga naugdaw gipanag-iya sa pamilyang Ricardo Gemina kansang kantidad gibanabanang mokabat og P30,000.

Si SPO1 Gerome Pardo sa Ronda Police Station nga nahinabi sa Banat News nagkanayon nga wala diha sa ilang balay ang tag-iya dihang nasunog kini.

Apan usa sa mga silingan mitug-an sa kapolisan nga sa wala pa mosilaob ang balay sa mga Gemina, nakakita siya’g tulo ka tawo nga mituyo pagduslit sa maong balay.

Ang maong saksi kansang ngalan gipugngan sa kapolisan miingon nga misinggit siya sa pagpangayo og panabang apan gipasalbahan siya sa armas sa mga arsonista.

Maoy hinungdan nga iya nalang kining gipasagdahan hangtod nga naugdaw sa hingpit ang maong pinuy-anan.

Gisuta karon sa kapolisan ang motibo sa maong sunog ug ang pagtino kun tinuod bang gidauban kini’g tuyo.